Bebé foin moris. Ilustrasaun

DILI, 17 abríl 2020 (TATOLI) – Tuir relatóriu hosi Ospitál Nasionál Guido Valadares (HNGV-sigla portugés), bebé hamutuk 53 maka mate iha inan nia kabun no depois partu ne’ebé akontese durante fulan-janeiru to’o marsu 2020.

Iha janeiru, HNGV rejista kazu inan isin-rua na’in tolu mate tanba partu ho kondisaun komplikada, sofre moras seluk hanesan infesaun, tensaun aas no seluk tan.

Xefe Gabinete Kontrolu Kualidade HNGV, Sara Maria Xavier, hateten durante fulan tolu ne’e sala maternidade konsege fó baixa no partu ba inan sira hamutuk ema 1453.

“Bebé ne’ebé mak mate iha inan-nia kabun laran hamutuk 26 durante fulan tolu nia laran no mós bebé sira ne’ebé mak moris mai depois hetan komplikasaun hanesan dada iis ladiak hamutuk 27 ne’e moris mai mate”, dehan Sara Maria Xavier ba jornalista sira iha ninia servisu fatin Bidau, ohin.

Totál pasiente 1453 ne’ebé baixa iha sala maternidade, sira ne’ebé partu 1377, partu ho kondisaun normál hamutuk 1034.

“Entaun partu ho sesariana ka partu husi operasaun sesariana iha 256 depois totál inan sira ne’ebé mak partu liuhusi instrumentál ka ventoja hamutuk 87”, tenik tan.

Kazu inan partu ho bebé moris uluk ho kidan hamutuk 31.

Daudaun ne’e númeru pasiente ne’ebé baixa iha sala maternidade HNGV aumenta maka’as, tanba atende mós pasiente hosi Sentru Saúde Vera Cruz no Sentru Saúde Formosa nian.

“Ita hatene katak HNGV ne’e hanesan prestasaun asisténsia kuidadu ba sekundáriu no tersiáriu tuir loloos partus normál sira labele mai iha HNGV maibé bele ba partu iha klíniku sira iha Dili laran”, nia sublina.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here