Ministra Finansa ein ezersísiu, Sara Lobo Brites. Imajen Tatoli/Egas Cristovão

DILI, 16 abríl 2020 (TATOLI) – Ministra Finansa ein ezersísiu, Sara Lobo Brites, informa to’o loron 10 abríl tinan ne’e, retornu investimentu fundu mina-rai hetan negativu.

“Dezempeñu fundu mina-rai, hakarak informa katak to’o 10 abríl ita-nia retornu investimentu iha fundu mina-rai hetan negativu pur volta millaun $300-resin”, dehan Sara Lobo iha Parlamentu Nasionál, kinta ne’e.

Nia adianta, reseita husi fundu mina-rai hamutuk millaun $199, ne’e duni to’o loron 10 abríl, retornu negativu ne’ebé rejista kontinua mantein balansu millaun $17-resin.

Tuir atuál Vise-Ministra Finansa ne’e, mudansa hirak ne’e akontese durante situasaun COVID-19 nian.

“Mudansa ne’ebé ho kuantidade aas, presu iha bolsa tun no sa’e kada loron no dala ruma iha segundu de’it, entaun ha’u hanoin ita hotu bele hakmatek tanba ita-nia investimentu ba longu prazu, tuir mudansa sira ne’e sei la fó impaktu maka’as ba ita-nia investimentu ne’e rasik”, nia akresenta.

Governante ne’e afirma tan, ho inserteza hanesan krize globál ne’e bele alastra to’o tinan ne’e ramata, tanba mudansa sira ne’e sempre akontese kada loron.

“Ita bele akompaña maibé la nesesáriu atu rejista ida ne’e hanesan preokupasaun ida tanba hanesan investimentu ba longu prazu nian”, nia realsa.

Antes ne’e, Governadór Banku Sentrál Timor-Leste (BCTL, sigla portugés), Abraão de Vasconcelos hateten, valór fundu mina-rai lakon kuaze biliaun $1,8 tanba kauza hosi merkadu finanseira internasionál.

Governadór BCTL ne’e subliña, períodu semana tolu ka haat ikus ne’e dezenvolvimentu iha merkadu finanseira internasionál ne’e iha impaktu boot tebes hosi COVID-19 no fatór sira seluk.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here