Primeiru-Ministru, Taur Matan Ruak hamutuk ho membru governu no ekipa CIGC, atualiza progresu servisu durante implementasaun Estadu Emerjénsia liga ho COVID-19, iha plenária, Parlamentu Nasionál, kinta ne’e. Imajen Tatoli/Egas Cristovão

DILI, 16 abríl 2020 (TATOLI) – Koordenadór Ekipa Estudu no Análiza Risku husi Sentru Integradu ba Jestaun Krize (CIGC, sigla Portugés), Francisco Guterres, hateten ekipa iha ona previzaun katak Governu Timor-Leste no setór privadu sira garante estoke ai-han iha rai-laran to’o fulan-jullu tinan ne’e.

“Ha’u hakarak ko’alia liu ba seguransa alimentár, tanba hanesan kestaun ne’ebé liga liu ba nutrisaun, liuliu oinsá ita atu prepara ai-han ba ita-nia komunidade sira atu kontinua nafatin iha nutrisaun sufisiente atu ita hamutuk bele aguenta luta hamutuk hasoru moras COVID-19,” tenik Koordenadór Francisco iha sesaun plenária  estraordinária kona-ba prevensaun no kombate surtu COVID-19 no ezekusaun deklarasaun Estadu Emerjénsia iha Parlamentu Nasionál, kinta ne’e.

Tuir nia, hafoin ekipa halo estudu no análiza ba risku, observa no haree katak iha fulan-abríl to’o jullu estoke fós sei disponível atu asegura alimentár iha territóriu Timor-Leste.

“Ita haree to’o iha fulan-abríl ne’e, ita disponível iha fós ne’ebé mak ita iha no ita-nia setór privadu sei iha hamutuk tonelada 14.000 no iha mós previzaun husi Ministériu Agrikultura no Peska (MAP) katak iha fulan-maiu nia laran sei kolleita fós ne’ebé ho kálkulu ita bele hetan tonelada 40.000 husi ita-nia agrikultór sira no ita mós bele hetan batar tonelada 80.000. Tanba ne’e ita bele asegura ai-han to’o fulan tolu mai tan”, informa eis governante ne’e.

Koordenadór ne’e afirma liútan, daudaun ne’e iha hela sujestaun ida ba Governu atu hahú haree fós liuhosi kontaktu Ministériu Negósiu Estanjeiru no Kooperasaun (MNEK), Ministériu Turizmu, Komérsiu no Indústria (MTKI), no MAP, nune’e  bele antesipa halo ona kontaktu ho nasaun hanesan Cambodia, Tailándia no Vietnam atu bele sosa tan fós tonelada 30.000.

“To’o agora, ita seidauk iha previzaun ida to’o bainhira mak moras ka vírus ne’e hotu, ne’ebé ita presiza duni iha rezerva seguransa alimentár. Nune’e bainhira karik COVID-19 alastra nafatin, ita bele uza  rezerva estoke ne’e hodi asegura ai-han iha ita-nia rai”, nia adianta.

Aleinde ne’e, nia afirma CIGC hato’o ona pedidu ba ho Organizasaun Nasaun Mundiál ne’ebé toma konta kona-ba ai-han (WFP, sigla inglés), atu konkorda no apoia ai-han ba Timor-Leste kuandu tama to senáriu piór liu ba propagasaun COVID-19.

“Ami mós koalia ona ho WFP, no sira mós sei halo pedidu ida atu konkorda hodi apoia kuandu laiha ona ai-han iha Timor-Leste”, nia akresenta.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here