Primeiru-Ministru, Taur Matan Ruak hamutuk ho membru governu no ekipa CIGC atualiza progresu servisu durante implementasaun Estadu Emerjénsia Liga ho COVID-19, iha plenária, Parlamentu Nasionál, kinta ne’e. Imajen Tatoli/Egas Cristovão

DILI, 16 abríl 2020 (TATOLI) – Primeiru-Ministru (PM), Taur Matan Ruak, informa loron 20 ona maka Sentru Integradu Jestaun Krize (CIGC, sigla portugés) hala’o servisu hafoin Prezidente Repúblika dekreta Estadu Emerjénsia, tanba ne’e Xefe Governu orienta ekipa tékniku CIGC prepara senáriu piór ligadu ho pandemia globál COVID-19 iha Timor-Leste.

“Ha’u hanesan líder ba sentru ida-ne’e, ha’u orienta atu haree liubá senáriu piór. Senáriu ultra-piór mak ida-ne’e, satán ita-nia sistema saúde iha problema boot, enkuantu nasaun sira ne’ebé dezenvolvidu liu konsidera sira-nia sistema saúde ne’e mellór iha mundu de’it laiha kapasidade. Ita kombina buat rua mak vontade no kapasidade, tanba ita uluk halo funu kapasidade laiha maibé vontade makaas liu kapasidade no ita lakon ema 200.000 mak ita foin manán”, dehan PM Taur iha Parlamentu Nasionál, kinta ne’e.

Xefe Governu adianta, fundu ne’ebé Parlamentu autoriza atubele foti, horisehik Governu aprova ona dekretu ba regra ezekusaun no ohin mak foin sai iha Jornál Repúblika, mezmu prosesu ne’e lentu uitoan.

“Ita determinadu loos oinsá maka bele hakbiit ita nia-an atu responde. Estadu Emerjénsia la’ós solusaun ba ita-nia problema maibé hanesan elementu ida importante loos atu ajuda ita reforsa iha distansiamentu fíziku no sosiál, ne’ebé bele minimiza redusaun númeru kontájiu tanba ita nian agora ne’e hanesan kazu importadu de’it”, Xefe Governu subliña.

Tuir eis Gerilleiru ne’e, kombate Coronavírus hanesan loloos funu ida invizível ba mundu tomak, tanba nasaun hotu rekorre meiu hotu atu kapasita-an kombate surtu ne’e iklui toma medida drástika.

“Hanesan limita ema-nia direitu sirkulasaun, direitu liberdade, reuniaun no manifestasaun inklui mós ita Timor-Leste halo”, nia akresenta.

Haree ba númeru infetadu iha mundu tomak, hamutuk kazu konfirmadu 2.083.304 to’o ohin loron, husi númeru ida-ne’e, ema na’in-134.616 mak mate no 510.341 maka rekuperadu.

Enkuantu, nasaun poténsia mundiál hanesan Estadu Unidu Amérika to’o ohin ema 644.089 maka pozitivu no mate hamutuk 28.529, la inklui nasaun sira iha Europa, Ázia no mundu tomak.

“Kombate ida-ne’e sai difísil liután kuandu la’ós de’it halo esforsu atu ema labele mate, maibé iha sorin seluk ninia impaktu sosiál no ekonómiku drástiku tebes, tanba millaun traballadór maka lakon servisu, família tomak mak mizéria, tanba rendimentu tun, ekonomia estagnadu, konetividade mundu paralizadu”, dehan Taur.

Nia hatutan: “Entretantu iha Timor-Leste ita sei la sees husi ida-ne’e, tuir senáriu otimista ita-nia esforsu tomak hakarak zero óbitu, maibé ita iha na’in-ualu infetadu, na’in-ida rekopera, no sira na’in-hitu mak iha izolamentu. Senáriu ultra-pesimista ba Timor tuir analiza Sentru Krize nian mak Timór bele sofre 390.000, katak porsentu 30 husi populasaun. Kazu rijeiru 156.000, kazu grave 58.000, ekivalente porsentu 15, sira ne’ebé grave no hetan asisténsia husi metigasaun asistida 19.500 no óbitu (mate) 16.000 ka ekivalente porsentu tolu husi populasaun”.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here