Ministu Interiniu atual Vise-Ministru Saúde, Bonifácio Maukoli dos Reis. Imajen/António Goncalves.

DILI, 16 abríl 2020 (TATOLI)—Ministériu Saúde (MS) liuhosi Ministru Saúde Interinu, Bonifácio Maukoli dos Reis, husu orsamentu millaun $45,5 hodi finánsia atividade ministériu nian relasaun ho prevensaun no kombate surtu COVID-19.

“Ministériu Saúde husu por volta millaun $45,5. Iha ne’ebá prevé ba bens no serbisu, kapitál menór, kapitál dezenvolvimentu no mós transferénsia públika. Agora kona-ba bens no serbisu hodi responde subsídiu ba profisionál saúde sira ne’ebé iha liña oin,” Ministru Saúde Interinu, Bonifácio Maukoli dos Reis, informa iha ámbitu debate kona-ba prevensaun no kombate surtu COVID-19 no ezekusaun deklarasaun estadu emerjénsia, iha plenária estraordinária Parlamentu Nasionál, kinta ne’e.

Governante ne’e esplika, kategoria kapitál menór tanba iha fatin balu presiza hela atu hola nesesidade hanesan kama no nesesidade importante sira seluk.

Kona-ba transferénsia públika, nia haktuir, Ministériu Saúde halo kontratu ba sosa ekipamentu sira-ne’ebé foin daudaun Timor-Leste asina hela kontratu ho UNDP atu halo aprovijionamentu ba akizisaun kompra medikamentu, kompra ba ekipamentu médiku, no mós ekipamentu protesaun individuál.

“Foin lalais ita asina kontratu millaun $5.7, ne’ebé hein katak semana oin ekipamentu sira-ne’e bele to’o ona para atu-bele fó resposta ba iha nesesidade sira-ne’e,” nia hateten.

Tuir nia, Ministériu Saúde mós prevé millaun $10-resin ba kapitál dezenvolvimentu tanba la’ós hanoin de’it ba situasaun agora maibé haree mós ba situasaun piór liu iha futuru.

“Tanba ita presiza identifika fatin atu-bele halo konstrusaun ida ke permanente. Nune’e, kuandu akontese kazu hanesan ne’e, ita iha ona ospitáll no iha ona ekipamentu ne’ebé disponivel atu-bele responde surtu sira-ne’ebé mak karik mosu iha futuru,” dehan Maukoli.

Parlamentu Nasionál aprova ona Fundu COVID-19 ho montante millaun $150 no hosi montante ne’e ministériu sira-ne’ebé toma konta COVID-19 19 tenke hatama planu hafoin asesu orsamentu refere.

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here