Sekretariu Estadu Protesaun Sivíl (SEPS), Joaquim José Gusmão dos Reis Martins. Imajen/Egas Cristovão

DILI, 16 abríl 2020 (TATOLI) – Ministériu Agrikultura no Peska (MAP) garante produsaun agrikola durante luta hasoru surtu COVID-19 iha Timor-Leste.

“Atu hateten katak MAP nia estensionista, tratorista, no funsionáriu sira iha munisípiu to’o nasionál, prontu tebes atu servisu hodi kombate COVID-19 liuhosi garantia produsaun agríkola ba ita-nia rain”, hateten Ministru Agrikultura no Peska, Joaquim José Gusmão dos Reis Martins iha Parlamentu Nasionál, kinta ne’e.

Tuir Ministru, durante ne’e MAP iha servisu ne’ebé mak besik ho Ministériu Koordenadór Asuntu Ekonómiku (MKAE) inklui Sentru Integradu Jestaun Krize (CIGC, sigla portugés) hodi ko’alia no mós halo opsaun hotu atu garantia ai-han iha rai-laran.

Nia relata liután, MAP halo ona projesaun ba hare no tuir projesaun, kolleita iha abríl bele atinje tonelada 607 hare no konverte ba fós karik sai tonalada 4.200.

Iha mós relatóriu husi tékniku sira ne’ebé maka iha kampu, katak husi kolleita hare iha tinan kotuk (2019) nian, sei disponível iha kampu hamutuk hare tonelada 578, bainhira konverte ba fós hamutuk tonelada 947.

Meiu atu hasai produsaun iha CIGC, maka MAP liuhosi Diresaun Jerál Agrikultura ne’ebé lidera husi ekipa tékniku seguransa alimentár hodi fó hanoin ba analiza seguransa alimentár iha rai-laran durante hasoru COVID-19.

“MAP prepara ona intervensaun maka’as iha Kosta-Súl ba segunda époka no proposta ba orsamentu preparadu ona no entrega ona CIGC no MKAE atubele hetan konsiderasaun”, dehan Joaquim.

Governante ne’e subliña, ba époka daruak ne’ebé maka rekerre ba fundu COVID-19 nian, MAP hakarak halo intervensaun iha Kosta-Súl ba natar hamutuk hotu etare 5.570 ho produtividade tonelada 3,5 ba kada etare, ne’ebé maka halo estimasaun atubele hetan hare iha époka daruak hamutuk hare tonelada 19.495, konverte ba iha fós karik sei hetan tonelada 11.600.

Aleinde ne’e, MAP mós halo intervensaun ba toos hodi kuda batar ho ninia produtividade tonelada 2,5 ba kada etare no ba iha etare 6.500 iha Kosta-Súl ne’ebé maka projesaun atu hetan batar tonelada 6.250 iha époka daruak nian.

“Previzaun ba époka daruak iha fulan-agustu nia laran. Intervensaun ida-ne’e nesesita tebes intervensaun lalais tanba époka daruak komesa iha fulan oin, karik fundu COVID-19 disponível ona, maka MAP husu atu fó prioridade ba iha MAP atu nune’e bele mobiliza ona mákina, fini, adubu, konbustível ba tratór atuhalo intervensaun lalais iha Kosta-súl iha époka daruak nian, karik tarde époka ne’e liu tiha tanba MAP servisu iha époka, ita labele prodús iha époka daruak nian”, afirma Joaquim.

Ministru ne’e informa, MAP liuhosi loja Agrikultór rua ne’ebé mak estabelese ona iha Dili, sei asegura no mantein nafatin sustentabilidade ai-hán no mós ba merkadu nian, ne’ebé maka produtu órtikultura no ai-fuan sira ne’ebé mai husi Minisípiu sira, loja agrikultór mobiliza no transporta nafatin produtu sira ne’e hodi abastese nafatin ba merkadu iha Dili.

Ba oin, karik Estadu deside lockdown totál hodi ema hotu labele sai, Joaquim argumenta, loja agrikultór mós dezeña mós opsaun delíberu ida ba iha uma ne’ebé mak hakarak.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here