Diretór Ezekutivu Klínika Bairru Pité, Daniel Murphy. Imajen Jogerjo Guterres

DILI, 16 abríl 2020 (TATOLI)–Jestór Klínika Bairro-Pité,  Inácio dos Santos hateten Saudozu Doutór Daniel Murphy nia isin-mate sei haloot iha semitériu Públiku Becussi, Dili, kinta lorokraik tuku 17:00 otl.

Antes ne’e, Doutór Daniel nia oan sira prefere liu atu halo kremasaun de’it liuhusi insinatór maibé mákina insinatór halo kremasaun avaria ona.

Lee mós: Saudozu Doutór Daniel Murphy Merese Hetan Kondekorasaun

“Ami ho doutór nia oan sira orsida tuku 9:00 otl atu halo kremasaun ba doutór nia isin-mate maibé pesoál sira ne’ebé toma konta ba mákina insinatór ne’e hato’o mai katak mákina aat”, Inácio haktuir via telefone ba Tatoli, ohin.

Nia hatutan, meiu seluk ne’ebé sira atu halo maka kremasaun ne’e liuhusi insinatór manuál iha Dolok-oan, maibé kondisaun agora daudaun tempu udan entaun labele.

“Loloos ami halo kremasaun uza manuál iha Dolok-oan maibé daudaun ne’e udan entaun ami atu hakoi de’it ona iha Semitériu Públiku Becussi”, nia haklaken.

Agora daudaun, Inácio tenik, sira prepara hela fatin iha Semitériu Becussi hodi haloot ikus Doutór nia isin-mate iha orsida lorokraik.

Jornalista : Felicidade Ximenes

Editór : Agapito dos Santos

HAKEREK NO HATÁN

Please enter your comment!
Please enter your name here