Kazu COVID-19 iha TL 229, Pozitivu Sa’e ba Na’in-17

DILI, 16 abríl 2020 (TATOLI)-Ekipa Sentru Integradu Jestaun Krize (CIGC-sigla portugés), ohin, relata tan katak, total kazu surtu Coronavirus ka COVID-19 iha Timor-Leste ho suspeitu na’in 229 no  kazu pozitivu sa’e ona hosi na’in-hitu (7) ba na’in-17 no  na’in-ida (1) rekupera.

Notísia Relevante : Pasiente Pozitivu COVID-19 iha TL Sa’e Ba Na’in Ualu

Portavós Sentru Integradu Jestaun Krize  (CIGC), Odete da Silva Viegas, esklarese katak, hosi suspeitu na’in-229 ne’e, na’in-12 hein rezultadu, na’in-haat (4) provavel, na’in-18 konfirmadu, na’in-195 negativu, pozitivu na’in-17 no rekupera na’in-ida (1).

“Pasiente  pozitivu COVID-19 hamutuk na’in-17 ne’e iha ona fatin izolamentu, Sentru Saúde Vera Krús, no sira mai hotu hosi fatin ida de’it. Mas, ha’u la bele fó detalladu hodi hein konfirmasaun ne’ebé sei fó sai aban,” hateten Odete Viegas, ba jornalista sira liuhosi konferénsia imprensa, iha Sentru Mídia COVID-19 iha Sentru Konvensaun Dili (CCD).

Lista ofisial ne’ebé fó sai hosi CIGC katak, abitante hirak ne’ebé submete hela iha konfinamentu obrigatóriu ka Kuarentena total na’in 567, kompostu iha Dili na’in-456 no iha munisípiu na’in-111.

Hosi sorin seluk, Odete Viegas informa mós katak abitante hirak ne’ebé pasa ona kuarentena durante loron 14 nia-laran hamutuk na’in-1.339 ne’ebé hosi Dili nian na’in-1.122 no iha munisípiu na’in-217.

Responde kona-ba pasiente ida ne’ebé karreta ambulánsia tula-sai hosi fatin Kuarentena Otél Fortuna, Dili, ohin, karik iha sintoma pozitivu, Odete Viegas, lia-tun dehan, ekipa médiku COVID-19 tula-sai duni pasiente ida hosi otél refere hodi lori ba izolamentu iha Vera Krús no hasai ona amostra hodi lori ba teste mas seidauk iha rezultadu katak, sei iha prosesu nia-laran.

Jornalista : Nelson de Sousa

Editór       : Francisco Simões