Airnorth to’o iha Aeroportu Internasionál Prezidente Nicolau Lobato, Comoro. Imajen Tatoli/António Gonçalves

DILI, 16 abríl 2020 (TATOLI) – Ministru Transporte no Komunikasaun, José Agostinho da Silva, informa Governu halo ona akordu ho kompañia Airnorth, hodi halo charter ka aluga, hodi halo operasaun iha semana ida dala-tolu ho kustu $15.000 ba viajen ba-mai dala-ida, hodi transporta ekipamentu médiku sira no hodi atende situasaun emerjénsia seluk.

Nia realsa liután, bazeia ba akordu, pagamentu ne’e depende ba nesesidade Airnorth transporta sasán.

“Kada semana tuir planu, sira halo voo mai Timor-Leste dala-tolu. Ida volta (ba-mai) ne’e, ninia montante orsamentu $15.000. Maibé sira haree ba nesesidade bainhira sira transporta mai, planeia semana ida dala-tolu, maibé depende ba realidade mak sei selu”, dehan Ministru ba Agência Tatoli, iha resintu Parlamentu Nasionál, kinta ne’e.

Notísia Relevante: Governu Asina Akordu ho Airnorth Asegura Konetividade Aéreu Iha Situasaun Emerjénsia

Airnorth Lansa Voo Dahuluk Tula Ai-Moruk no Ekipamentu Médiku ba COVID-19

Tuir Ministru, kona-ba transporta sasán, Ministériu Saúde maka hatene tanba nesesidade ne’ebé mai liga ho ekipamentu médiku.

“Kona-ba kontrolu ekipamentu husi parte Ministériu Saúde no mós alfándega mós iha. Atendimentu hanesan bain-bain maibé eseptu ba pasajeiru. Itania pesoál ne’ebé koloka iha ne’ebá sira halo atendimentu”, nia akresenta.

Hafoin Governu Timor-Leste selebra akordu ho kompañia aéreu, Airnorth, aviaun australianu ne’e lansa voo dahuluk iha 10 abríl, tula ai-moruk no ekipamentu médiku nesesáriu hodi kombate COVID-19.

Tuir akordu ne’ebé estabelese ona iha loron tersa (07/04), ligasaun aéreu ne’e atu garante konektividade iha situasaun emerjénsia nia laran.

“Ita kontratu ema-nia aviaun ka charter aviaun, ho objetivu atu fasilita ita tanba Timór seidauk iha aviaun rasik atu asegura ekipamentu médiku no ba kestaun nesesidade emerjénsia karik ita presiza”, afirma Ministru José Agostinho.

Akordu hirak ne’e mosu, hanesan resposta ba restrisaun viajen nian ho eskala boot ne’ebé Governu estabelese ona hodi hapara propagasaun COVID-19 no evita atu Timor-Leste labele sai izoladu, sein iha konetividade globál ne’ebé mak esensiál ba movimentu merkadoria, fornesimentu médiku sira ka ba transporte pasajeiru sira iha situasaun emerjénsia nia laran.

Governante ne’e adianta, Airnorth lansa ona voo dahuluk husi Darwin mai Dili iha semana kotuk.

“Foin daudaun, hanesan ita hotu haree sira transporta duni ekipamentu ba prevensaun COVID-19 husi Austrália mai Timor-Leste”, nia akresenta.

Governu liuhosi Autoridade Aviasaun Sivíl Timor-Leste (AACTL, sigla portugés) iha loron 4 abríl deside suspende provizóriu operasaun komersiál internasionál husi nasaun li’ur hodi evita propagasaun surtu COVID-19.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here