Imajen Espesiál.

DILI, 16 abril 2020 (TATOLI)–Estadu Timor-Leste (TL) Kondekora títulu póstumu Doutór Daniel John Murphy ho Medalla Orden TL, tuir dekretu Prezidente Repúblika númeru 31/2020, hosi loron 16 fulan abril.

Dekretu ne’ebé fó sai husi prezidénsia Repúblika hateten, uluk iha tempu susar durante prosesu luta ba ukun-an, ema estranjeiru oin-oin mak fó kontributu ba ita-nia luta liuhosi dalan on-ioin. Ohin loron, iha prosesu dezenvolvimentu nasionál, ema estranjeiru oin-oin mós fó sira-nia kontributu mai ita iha setór oin-oin.

Ema estranjeiru ida ne’ebé hahú kedas hosi tinan 1998 mai hela iha Timor-Leste no hala’o ninia knaar iha setór saúde mak ita-nia amigu boot Doutór Daniel John Murphy. Ita-nia amigu matebian ida-ne’e ninia obra boot ida ne’ebé mak fó ona tulun ba ema rihun ba rihun iha ita-nia rain ne’e mak Klínika Bairru Pité.

Doutór Daniel John Murphy, halo serbisu ho badinas nafatin hodi fó tulun ba ema moras rihun ba rihun durante ne’e. La’ós de’it fó tulun liuhosi tratamentu no ai-moruk iha ita-nia rai laran, Doutór  ne’e mós ajuda ona ema oin-oin ba halo tratamentu iha rai liur, bainhira laiha posibilidade atu halo tratamentu iha rai laran.

Imajen Espesiál

Klínika Bairru Pité sai fatin mahon ba ema sira ne’ebé halerik tanba hetan moras iha sira-nia isin-lolon. Klínika ne’e nuu’dar marka ida hosi obra boot ida ne’ebé mak ema estranjeiru ne’e hatudu ona ho determinasaun boot. Maske hasoru susar oin-oin,   Doutór ne’e kontinua halo esforsu hodi buka dalan oin-oin atu nune’e Klínika ne’e bele eziste nafatin.

Ita hotu-hotu iha devér atu rekoñese no valoriza dedikasaun no kontributu boot hirak ne’ebé mak sidadaun estranjeiru ne’e hatudu ona mai ita hotu durante nia moris iha Timor-Leste.

Ohin, Estadu no Nasaun tomak fó rekoñesimentu no valorizasaun, liuhosi kondekorasaun Orden Timor-Leste, ba knaar importante hirak ne’ebé mak Doutór Daniel John Murphy hala’o tiha ona.

Orden Timor-Leste mosu hosi Dekretu-Lei númeru 20/2009, loron 6 fulan-maiu, atu rekoñese ema estranjeiru ka sidadaun nasionál, ne’ebé mak liuhosi sira-nia atividade profisionál, sosiál ka asaun espontánea ne’ebé nakonu ho korajen, fó ona kontributu boot ba Timor-Leste, ba Timoroan ka ba umanidade.

Nune’e, Prezidente Repúblika, liuhosi proposta Konsellu Agrasiamentu no Orden Onorífika nian, ne’ebé harii liuhosi Dekretu Prezidente Repúblika númeru 13/2013, loron 24 fulan-jullu, no bazeadu ba kompeténsia ne’ebé temi iha alínea j) hosi artigu 85 Konstituisaun Repúblika Demokrátika Timor-Leste, konjuga ho artigu 2, ho artigu 4, númeru 1, no mós ho artigu 5, alínea a), hosi Dekretu-Lei númeru 20/2009, loron 6 fulan-maiu, dekreta:

Kondekora, a título póstumo, Doutor Daniel John Murphy ho Medalla Orden Timor-Leste.

Notísia Relevante: PR Hato’o Sentidu Kondolénsia ba Família Saudozu Daniel Murphy

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here