Ministru Saúde Interinu atuál Vise-Ministru Saúde, Bonifácio Maukoli dos Reis. Imajen Tatoli/Antonio Goncalves.

DILI, 16 abríl 2020 (TATOLI)—Ministru Saúde Interinu atuál Vise-Ministru Saúde, Bonifácio Maukoli dos Reis informa, ema na’in-hitu (7) ne’ebé pozitivu ba surtu COVID-19 nia kondisaun ladún grave.

“Atu informa iha-ne’e katak ema na’in-hitu (7) ne’ebé mak agora daudaun pozitivu Coronavirus (COVID-19) ne’e, sira-nia saúde ladún grave. Sei kmaan hela no sira seidauk tama iha faze ida grave,” Maukoli informa iha ámbitu debate kona-ba prevensaun no kombate surtu COVID-19 no ezekusaun deklarasaun estadu emerjénsia, iha plenária estraordinária, Parlamentu Nasionál, kinta ne’e.

Ministru Saúde Interinu ne’e fó-sai katak, kondisaun atuál ema na’in-hitu oras ne’e di’ak hela maibé pesoál saúde kontinua halo akompañamentu.

Tanba ne’e, Ministru Saúde Interinu ne’e husu ba públiku labele pániku maibé kontinua hakmatek iha uma hodi kumpre regra estadu emerjénsia ne’e, atu nune’e timoroan hotu bele hadook-an hosi surtu COVID-19 ne’ebé oras ne’e invade nasaun barak iha mundu.

Maukoli mós atualiza hodi fó-sai katak, kazu foun pozitivu iha tan ema-na’in 10 no oras ne’e sa’e ona kazu 17.

Notísia Relevante: Kazu COVID-19 iha TL 229, Pozitivu Sa’e ba Na’in-17

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here