Prezidente Autoridade Munisipiu Baucau, António Guterres. Imajen/Cancio Ximenes

DILI, 15 abril 2020 (TATOLI)—Prezidente Autoridade Munisípiu Baucau, António Augusto Guterres hateten, ekipa vijilánsia iha Munisípiu Baucau hahú funsiona iha 13 abril hodi halo prevensaun rega dezinfetante ba karreta-motor ne’ebé movimentu hosi Baucau-Dili no Dili-Baucau hodi la’o tuir regra ne’ebé define hosi Estadu Timor-Leste.

“Horiseik ami halo enkontru estraordináriu ida ho Komandante Polisia Munisípiu Baucau, segundu komandante terrestre no komandante Operasionál ho Ministériu Saùde hodi komesa funsiona iha sentru vijilánsia ba rega dezinfetante ba movimentasaun karreta no motor hosi Baucau-Dili no Dili-Baucau iha oras 24 nia-laran,” dehan Prezidente Autoridade Munisípiu Baucau, António Augusto Guterres, ba ajénsia TATOLI via telefone, kuarta ne’e.

Nia hatutan, funsionamentu regra Estadu Emerjénsia iha Munisípiu Baucau ba movimentu ema ho transporte hahú funsiona iha 13 abril 2020, oras 00:00 to’o 26 abril 2020 maibé depende ba situasaun.

Tuir nia, ekipa vijilánsia serbisu hamutuk ho Falintil-Forsa Defeza Timor Leste (F-FDTL) no Polisia Nasionàl Timor Larosa’e (PNTL) inklui pesoál saùde sira iha dalan kruzamentu sira iha Baucau nian hodi halo prevensaun ba viajén sira husi Dili-Baucau no Baucau-Dili.

“Maibé la signifika taka merkadu. Ita só halo de’it prevensaun,” nia hateten.

Nia afirma, iha mós ekipa vijilánsia ne’ebé hala’o nia atividade hahú iha loron 13 abril no sei ramata iha 17 abril 2020 hodi halo sensibilizasasun ba prevensaun COVID-19 nian iha Postu Administrativu to’o suku sira, atu nune’e komunidade sira bele hatene informasaun kona-ba COVID-19 no oinsá atu bele kombate virus ne’e.

Nia informa, kona-ba atividade sensibilizasaun saùde iha komunidade ho ekipa Nasionàl ne’ebé anúnsia informasaun ba komunidade sira iha Postu no suku sira iha Munisípiu Baucau nian ho kareta lima (5).

“Atividade sensibilizasaun saùde iha kareta lima ne’ebé suporta hodi hato’o insformasaun ba públiku. Amu pároku Vila Nova Baucau mak suporta kareta ida no haat seluk husi Nasionàl hodi anúnsia informasaun kona-ba COVID-19. Iha loron 13 abril Postu Administrativu Baucau Vila, horiseik (17/04/2020) iha Postu Venilale ho Baguia no ohin (15/04/2020) iha Postu Laga no Quelicai no aban (16/04/2020) iha Vemasse no Baucau Vila nune’e loron ikus (17/04/2020) iha Baucau Vila nafatin,” nia dehan.

Entretantu, nia haktuir, empreza husi Munisípiu Viqueque, Lospalos no Baucau mak bele la’o ba-mai hodi halo asesu ba kompra nesesidade bázika nian iha Nasionàl, ne’ebé akompaña ho dezinfetante ba sira-nia kareta iha oras movimentu nian nune’e labele COVID-19 labele da’et.

“Ita-nia empreza sira husi Munisípiu tolu hanesan Viqueque, Lospalos no Baucau mak presiza halo kompra ba nesesidade bázika (sembako, red) ruma entaun tenke rega ho aimoruk dezinfetante ba kareta, nune’e mantein prevensaun no tenke uza máskara no luvas bainhira halo movimentu ba-mai,” nia hatutan.

Aleinde ne’e, nia dehan, ekipa task force prevensaun COVID-19 iha Baucau mós halo ekipa integradu lojístiku hodi bele tau matan ba ajudu sira hanesan ekipamentu sira hosi entidade públiku no mós organizasaun balu.

“Ami mós iha ekipa integradu lojístiku no oinsá mak ami bele hetan apoiu ruma hosi komunidade ka entidade públiku no mós organizasaun balu karik iha ajudu hanesan ekipamentu prevensaun, hahan no fasilidade hodi halo atividade vijilansia durante luta atu kombate COVID-19 iha Baucau,” nia esplika.

Durante ne’e, nia informa, ekipa integradu vijilánsia Munisípiu Baucau hetan apoiu hosi sosiedade sivíl, Asosiasaun Veteranu, pesoál Veteranu, entidade públiku no seluk tan.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here