Primeiru-Ministru, Taur Matan Ruak hamutuk ho membru governu no ekipa CIGC, atualiza progresu servisu durante implementasaun Estadu Emerjénsia liga ho COVID-19, iha plenária, Parlamentu Nasionál, kinta ne’e. Imajen Tatoli/Egas Cristovão

DILI, 16 abríl 2020 (TATOLI) – Primeiru-Ministru (PM), Taur Matan Ruak, informa, iha sesta aban (17/04), ekipa Sentru Integradu Jestaun Krize (CIGC, sigla portugés), ne’ebé nia rasik lidera, sei diskute hikas nesesidade ba prolongamentu Estadu Emerjénsia iha Timor-Leste ligadu ho surtu COVID-19.

Xefe Governu hato’o lia hirak-ne’e bainhira hamutuk ho ekipa CIGC no membru governu balun, atualiza progresu servisu durante implementasaun Estadu Emerjénsia iha plenária, Parlamentu Nasionál, kinta ne’e.

Iha loron 27 marsu, Prezidente Repúblika, Francisco Guterres ‘Lú-Olo deklara Estadu Emerjénsia hafoin Parlamentu  Nasionál a-favór ho unanimidade hodi fó autorizasaun ba Xefe Estadu dekreta, nune’e bele halo distansiamentu sosiál ne’ebé nu’udar meiu ida halo prevensaun ba COVID-19.

Estadu Emejénsia entra ein vigór iha loron 28 marsu, hahú oras 00:00 to’o 26 abríl 2020, oras 23:59.

Notísia Relevante: KM Solisita PR Lú Olo Dekreta Estadu Emerjénsia Relasiona ho COVID-19

Nune’e, Governu sei haree ba nesesidade atu diskute prolongamentu Estadu Emerjénsia ne’ebé menus semana rua tan atu ramata.

Xefe Governu ne’e afirma, kontiúdu hosi Estadu Emerjénsia ne’ebé daudaun implementa regra balun rigorozu tebes, maibé realidade iha implementasaun Governu uza métodu progresivu.

“Iha deklarasaun Estadu Emerjénsia ne’e hatudu dalan rigorozu tebes, maibé iha implementasaun Governu uza métodu progresivu tuir realidade ne’ebé iha, atu labele aperta derepente populasaun tanba iha sorin seluk tau atensaun mós ba ninia efeitu priskolójiku, ekonómiku no sosiál ne’e”, PM Taur subliña.

Entretantu, medida ezekusaun ne’ebé Governu aplika durante Estadu Emerjénsia maka:

1.  Bandu ema estranjeiru sira atu labele tama mai iha territóriu Timór.

2. Kontrola efetivu sanitáriu ka saúde, hanesan medida temperatura isin manas kona-ba tama ka sai husi territóriu nasionál Timor-Leste nian, ne’ebé Ministériu Saúde hala’o hela.

3.  Ema ka individu ne’ebé maka tama mai territóriu nasionál Timor-Leste, obrigatoriamente tenke submete ba karantina.

a. Ema sira ne’ebé maka iha sintoma, obrigatóriu sujeitu ba izolamentu terapéutiku.

b. Ema sira ne’ebé laiha sintoma Coronavírus, sei submete de’it ba izolamentu preventiva ba períudu loron 14.

4. Suspende Transporte Públiku ne’ebé tula ema ka pasajeiru barak liu. Ita-nia Polísia Nasionál Timor-Leste (PNTL) agora halo hela nia servisu hodi implementa pontu ida-ne’e.

5. Bandu atu halo reuniaun ka manifestaun ne’ebé halibur malu, labele liu ema na’in-lima.

“Ita-nian PNTL sei ezekuta hela regra ida-ne’e kuandu ita-nia sidadaun sira la kumpre, maka PNTL sei foti medida iha terrenu hodi fó sansaun ba ita-nia komunidade ne’ebé la kumpre”, PM realsa.

6. Bandu atu halo atividade eventu sosiál ka kulturál, desportu no atividade seluk ne’ebé halibur liu ema na’in-lima.

7. Bandu atu selebra ka halo atividade ne’ebé ho kariz relijiaun no mós eventu sira seluk ho kultura ne’ebé halibur ema liu na’in-lima.

8. Karik iha funerál ka hakoi ema mate ho nia kodisaun maka, ho distánsia entre ema ba ema seluk mínimu metru ida, se di’akliu distánsia entre ema ba ema seluk liu metru ida.

9. Membru Governu ne’ebé responsável iha área saúde liuhosi despaisu bele halo rekizasaun ba kualkér bens servisu ba pesoál singulár ka koletivu iha direitu públiku ka privadu ne’ebé nesesáriu hodi kombate ba moras Covid-19.

10. Husu komersiante sira atu prepara kondisaun, atu nune’e klinte sira bele fase liman antes tama no sai husi fatin komérsiu ne’e.

11. Ba ema hotu ne’ebé servisu ka ba sosa sasán iha fatin komersiál sira tenke uza máskara no fase liman antes tama no hafoin sai husi fatin ka loja.

12. Ba komunidade ka kompradór sira ne’ebé la kumpre hodi fase liman antes tama no sai husi fatin komersiál ne’e lalika ba kompra iha ne’ebá.

13. Ba vendedór ambulante ka tiga roda sira mós tenke kumpre regra ne’ebé temi ona iha númeru 10,11 no 12 ba medida ezekusaun ida-ne’e.

14. Ba Membru Governu sira no órgaun ezekutivu sira, ba pesoál sira ka koletivu públika hanesan adminstrasaun indireta estadu nian, husu atu indentifika rekursu umanu ne’ebé nesesáriu atu asegura funsionamentu ho rejime servisu ne’ebé mínimu ka natón servisu públiku ne’e superiormente presiza.

15. Suspende eskola hotu iha iha territóriu Timor-Leste.

16. Fiskalizasaun ba diploma ida-ne’e ka detallu Estadu Emerjénsia ida-ne’e sei halo husi forsa servisu seguransa sira maka hanesan ajente  PNTL, F-FDTL, Protesaun Sivíl, inspetór autoridade seguransa alimetár no ekonomia.

Entertantu, medida ezekusaun Estadu Emerjénsia ne’e dekreta husi Governu 3/2020, 28 marsu hodi fasilita públiku bele komprende medida ezekusaun ba deklasaun Estadu Emerjénsia hamutuk 16, ne’ebé publika ona iha Jornál Repúblika.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here