DILI, 16 abríl 2020 (TATOLI) – Sentru Integradu ba Jestaun Krize (CIGC-sigla Portugés) kontinua apela ba komunidade sira atu halo prátika prevensaun ba an rasik no ba sosiedade, nu’udar meiu atu salva ka prevene-an, família no nasaun atu hetan kotaminasaun COVID-19.

“Ami Husu nafatin ba komunidade atu kontinua fase liman bebeik, tenke mantein distánsia fíziku no sosiál liu metru ida no kontinua uza máskara obrigátoriu. Tanba estudu hatudu katak iha nasaun sira ne’ebé afetadu maka’as COVID-19, bainhira uza máskara obrigatóriu iha fatin públiku sira konsege redús ninian númeru kontaminasaun”, tenik Koordenadór ba Ekipa Estudu no Análiza Risku iha CIGC, Francisco Guterres, iha plenária Parlamentu Nasionál, kinta ne’e.

Tuir eis Sekretáriu Estadu Seguransa ne’e, bainhira uza máskara, bele prevene-an husi COVID-19 no prevene hada’et ba ema seluk.

Ho nune’e, lori CIGC nia-naran, nia apela ba sidadaun hotu atu uza máskara obrigatóriu iha fatin públiku sira.

“Tanba ita haree kuandu iha ona kazu pozitivu, ita tenke buka ema sira ne’ebé halo kontaktu hodi submete ba kuarentena obrigatóriu, liuliu família sira atu ita bele hamate korente kontamisaun COVID-19”, nia afirma.

Koordenadór ne’e adianta, presiza duni rekursu ba setór saúde atubele luta kontra COVID-19 iha Timor-Leste, tanba daudaun númeru konfirmadu kontinua sa’e nafatin no laiha sinál atu tun filafali.

Tuir nia, parte Governu, liuliu parte CIGC presiza uza métodu prevensaun ne’ebé rigór, tanba ne’e Governu rasik deside ona taka ona fronteira terrestre no aéreu.

“Ita-nia nasaun di’ak tebes tanba aplika konfinamentu obrigatóriu ne’e hanesan sira ne’ebé mai husi área afetadu tenke tama iha konfinamentu obrigatóriu no ba konfinamentu rezidénsia, maibé tenke prense rekezitu ne’ebé Ministériu Saúde iha”, nia akresenta.

Nia relata liután, daudaun iha parte legál kontinua haree atu forsa tarefa hanesan Forsa Defeza no Seguransa hodi bele kontinua tuir regra ka medida ne’ebé estabelese ona iha Estadu Emerjénsia.

Entretantu, daudaun ne’e tuir dadus atuál ne’ebé fó sai husi CIGC, númeru konfirmadu COVID-19 iha Timor-Leste hamutuk 18, husi totál ne’e na’in-ida mak rekuperadu no na’in-17 mak iha hela fatin izolamentu Vera Cruz hodi hetan kuidadadu intensivu.

Ema ne’ebé pozitivu ona iha Timor-Leste, daudaun ne’e konsidera hanesan kazu importadu no to’o agora seidauk konfirma kazu transmisaun lokál.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here