Primeiru-Ministru, Taur Matan Ruak hamutuk ho membru governu no ekipa CIGC atualiza progresu servisu durante implementasaun Estadu Emerjénsia Liga ho COVID-19, iha plenária, Parlamentu Nasionál, kinta ne’e. Imajen Tatoli/Egas Cristovão

DILI, 16 abríl 2020 (TATOLI)—Koordenadór Estadu Maiór ba Sentru Integradu Jestaun Krize (CIGC-sigla portugés), Pedro Klamar Fuik, esplika enkuadramentu globál no grande estratéjia sira ba Parlamentu Nasionál (PN).

Iha Reuniaun Plenária Estraordinária ne’e, parte governu lidera hosi Primeiru-Ministru (PM), Taur Matan Ruak, membru governu sira no ekipa CIGC hodi atualiza prevensaun no kombate surtu COVID-19 no ezekusaun deklarasaun estadu emerjénsia.

Iha debate ne’e, Koordenadór Estadu Maiór ba Sentru Integradu Jestaun Krize, Pedro Klmara Fuik, lori matéria enkuadramentu legál  kona-ba COVID-19 no grande estratéjia hodi kombate COVID-19, sistema kombate COVID-19, ne’ebé define objetivu, medida sira no resposta ba sistema alerta ne’ebé mak Timor-Leste iha.

Nia esplika mós kona-ba asaun koordenasaun ne’ebé mak Timor-Leste iha hodi bele responde ba grande estratéjia ne’ebé mai Timor-Leste iha, halo mós avaliasaun ba situasaun jerál no depois rekomendasaun balun.

Klamar Fuik haktuir, hafoin funu mundiál daruak ameasa oin-oin invade mundu tomak, tantu rai kiik no boot, liuliu rai boot sira-ne’ebé iha interese própriu.

Tanba rai boot sira hakarak define espasu ba sira-nia interese rasik nune’e haree katak fenómena hosi globalizasaun ne’ebé maka mai hosi informasaun  ekonomia, siénsia no teknolojia hakat liu fronteira hotu-hotu hamosu kompetividade entre rai hotu-hotu.

Nune’e mós, nia hatutan, antagonizmu entre rai hotu-hotu, rai kiik no rai boot, rai riku, rai kiak hotu-hotu sofre fenómena globalizasaun COVID-19 ne’e.

Nia afrima, rai ne’ebé mak iha kbiit boot define tipolojia funu nian oin-oin hanesan doutrina tradisionalmente iha de’it parte tolu ka haat hosi tipolojia funu nian hanesan guera nukleár, biolójiku, kímika no guera klásika.

“Maibé, ohin loron, iha mundu ne’ebé maka globalizadu mosu guera psikolojiku ekonómiku, komérsiu ho tan ida bele kategoriza katak hanesan karik konspirasaun ida ou provabilidade ida COVID-19 ne’e bele sai hanesan uma guera biolójika. Ida-ne’e kestaun  ida ba ita hotu  nia konsiderasaun,” dehan Koordenadór Estadu Maiór ba Sentru Integradu Jestaun Krize, Pedro Klamar Fuik, iha Parlamentu Nasionál, kinta ne’e.

Nia hatutan, rai hotu-hotu kiik ka boot idak-idak prepara nia-aan para atu-bele enfrenta fenómena globál ida-ne’e, iha kazu partikulár ida-ne’e maka COVID-19 hanesan pandemia. Hanesan pandemia ba situasaun rai hotu-hotu nian buka oinsá bele responde situasaun iha Timor-Leste.

“Rai barak primeiru teste sira-nia sistema estadu nian, atu responde ba pandemia hanesan ne’e funsiona ka lae. Rai balun primeiru deklara Estadu Emerjénsia mak depois teste ba sira-nia sistema. Agora estadu hanesan autoridade atu responde ba ameasa globál ne’e, regra mak podér estadu nian tenke iha. Podér signifika hanesan vontade multiplika kapasidade,” nia dehan.

Nia dehan, iha realidade Timor-Leste nian hakarak kontrola propagasaun COVID-19, ne’e sai hanesan vontade nasionál katak podér nasionál iguál podér nasionál multiplika kapasidade, sala situasaun kompoin podér nasionál.

“Kona-ba grande estratéjia ba kombate COVID-19 hosi ita-nia rain, podér nasionál tau hamutuk esforsu hotu-hotu ne’ebé mak nasaun iha, liuliu rekursu nasionál para kombate inimigu komún ne’e ka inimigu invizivel ne’e,” nia hateten.

Sistema estadu nian ba iha sub-sistema ne’ebé mak eziste, nia dehan, normalmente sub-sistema ne’ebé mak eziste haree liu ba iha parte sistema saúde, sistema ekonómika, sistema kulturál, sistema geopolítika no defeza nasionál.

“Ita-nia rain responde kedas ida-ne’e iha kedas fevereiru. VIII Governu toma medida balun no komisaun interministeriál ne’ebé mak kria iha 28 marsu no fó biban ba kriasaun Gabinete Integradu Jestaun Krize ne’ebé mak sai hosi diploma governu nian iha 31 marsu. Hosi kapasidade organizasionál rua ne’e maka tau forsa tarefa konjunta integrada iha asaun iha terrenu. Hosi Sentru Jestaun Integradu Krize nian hamoris Sala de Situasaun,” Pedro Klamar Fuik esplika.

Nia salienta, Sala de Situasaun ne’e iha misaun importante rua mak ida fó apoia ba Primeiru-Ministru hanesan Komandante Operasionál Estadu Emerjénsia, ida fali maka halo koordenasaun ba rekursu nasionál hotu-hotu ne’ebé mak estadu dispoin atu-bele kombate lisuk inimigu komún ne’e.

Hosi parte estrutura ne’ebé mak iha, nia hateten, hosi Estadu Maiór iha estrutura rua mak ida Estadu Maiór Espesiál halo estudu, ida fali Estadu Maiór Konjunta implemeta no koopera.

Nia informa, orgánika efetivu ba iha terrenu hamutuk ema na’in-500, profisionál saúde iha na’in-150, sala de situasaun ema na’in-129 no forsa tarefa maka iha terrenu hamutuk ema na’in-221.

“Se iha senáriu ne’ebé mak evolui ba iha situasaun ne’ebé mak ita presiza halo lockdown nasionál ou lockdown rejionál ba iha zona kontaminada, signifika katak efetivu orgánika sei muda entre ema na’in 1500 to’o na’in-2000 efetivu,” Koordenadór Estadu Maiór ba Sentru Integradu Jestaun Krize halo previzaun.

Nia esplika, hosi Estadu Maiór espesiál iha divizaun ka unidade téknika hitu (7) ne’ebé maka halo de’it estudu no koordenasaun para bele fó apoia ba Primeiru-Ministru ne’ebé nu’udar Komandante Operasionál atu halo desizaun.

Hosi fali Estadu Maiór Konjunta hanesan ekipa téknika ida, ne’ebé mak iha tarefa espesífika atu-bele korresponde ba kombate COVID-19, iha ne’e sira-nia operasaun foka liu ba protesaun sukorru, movimentasaun administrativa no lojístika.

“Objetivu ita hakarak atu kontrola propagasaun COVID-19, atu-bele kontrola doutrinariamente primeiru tenke kontein depois ataka ba iha alvu ne’ebé mak ita hakarak no depois asegura no kontrola parsiál ka kontrola total,”  nia dehan.

Nune’e, tuir nia, define objetivu estratéjiku atu-bele realiza objetivu finál no objetivu estratéjiku estabelese mekanizmu hodi resposta ba sistema alerta ne’ebé mak Timor-Leste iha no define objetivu operasionál ba iha sentru kuarentena.

“Nune’e mós sekarik iha propagasaun ba liu nível nasionál sei identifika zona sira-ne’ebé mak kontaminada para depois bele halo mós operasaun no triajen. Iha parte ida-ne’e, ami prepara  hela espesialidade, Doutór Rui Maria de Araújo mak halo ida-ne’e,” hateten Koordenadór Estadu Maiór ba Sentru Integradu Jestaun Krize.

Notísia Relevante: PM Taur Orienta CIGC Haree Liubá Senáriu Piór

Jornalista : Evaristo Soares Martins

Editór      : Cancio Ximenes

HAKEREK NO HATÁN

Please enter your comment!
Please enter your name here