Diretór Estabelesimentu Prizaun Becora, João Domingos. Imajen/Dok. Tatoli

DILI, 15 abríl 2020 (TATOLI) – Sentru Estabelesimentu Prizaun Becora,  hola ona desizaun hodi  extende suspensaun  atividade vizita hosi família ba prezu-sira iha prizaun-laran to’o loron ne’ebé seidauk termina hodi evita propagasaun surtu Coronavirus ka COVID-19.

Notísia Relevante : Prizaun Becora Suspende Atividade Vizita

Antes ne’e, Prizaun Becora kumpre despaxu Ministru Justisa Manuel Cárceres, hodi suspende atividade vizita família no atividade sosiál iha prizaun Becora, Gleno ho Suai, hahú hosi loron 23 marsu to’o 10 abríl 2020.

“Mezmu ho avizu ne’ebé antes ne’e ita fó sai to’o de’it iha loron 10 abríl, maibé agora ita kontinua halo suspensaun hodi evita propagasaun COVID-19,” informa Diretór Prizaun Becora João Domingos hodi responde Ajénsia Tatoli, via mensajen WhatsApp, ohin.

Nia afirma katak, bainhira estadu Timor-Leste dekreta ona dehan, Timor-Leste livre hosi surtu COVID- 19 maka atividade vizita família ba prizaun bele normaliza fali.

Ba prezu ne’ebé foin tama prizaun hodi kumpre nia pena ka sentensa, diretór Prizaun Becora João Domingos, hateten, médiku-sira iha Klínika Prizaun Becora  aplika kuarentena obrigatóriu durante loron-14.

“Hosi loron 23 marsu to’o agora, dadur foun rejistu na’in-neen (6) hosi jurizdisaun Dili na’in-haat (4) no Baucau na’in-rua (2).  Sira-ne’e mai tama, ami halo kuarentena loron 14 ne’ebé hetan kontrola hosi médiku sira,” João Domingos hateten.

Nia haktuir, durante observasaun médiku sira-nian ba kondisaun dadur foun sira no dadur-tuan sira hatudu katak, laiha sintoma ruma kona-ba surtu COVID-19.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here