DILI, 15 abril 2020 (TATOLI)–Prezidente Repúblika, Francisco Guterres “Lú Olo”, ohin, ofisialmente haruka ona karta ba Primeiru-Ministru Taur Matan Ruak katak aseita Primeiru-Ministru dada-sai karta pedidu demisaun ne’e.
Tuir komunikadu ne’ebé fó sai husi prezidénsia Repúblika katak, tuir artigu 112°, alínea b) Konstituisaun RDTL, kompete ba Prezidente Repúblika simu ka la simu pedidu demisaun husi Primeiru-Ministru.
Artigu refere, kompete mós ba Prezidente Repúblika, aseita ka lae pedidu dada-sai pedidu demisaun husi Primeiru-Ministru, bainhira Prezidente Repúblika seidauk foti desizaun kona-ba pedidu demisaun.
Liuhosi karta ne’e, Prezidente Repúblika reafirma katak Primeiru-Ministru sei hala’o nafatin ninia knaar baibain ho efeitu konstitusionál no legál hotu-hotu.
Prezidente Repúblika hateten mós katak sei fó kolaborasaun institusional ne’ebé presiza atu Primeiru-Ministru bele hala’o ninia mandatu nu’udar Xefe Ezekutivu, atu asegura funsionamentu regular VIII Governu Konstitusional, tuir ita-nia Konstituisaun Repúblika.
Prezidente afirma, hasees-an husi COVID-19 no asegura rekuperasaun husi efeitu aat husi inundasaun Dili iha 13 marsu 2020 tama iha ámbitu interese nasionál.
Iha karta ne’e, Prezidente Repúblika deklara katak Estadu Timor-Leste presiza prepara no hahú rekuperasaun ekonómika no sosiál.
Hosi asuntu interese nasional sira ne’e mak Prezidente Repúblika konfirma nesesidade atu asaun governativa hosi Primeiru-Ministru no VIII Governu Konstitusional kontinua nafatin.
Entretantu, iha loron 8 abril 2020, kuarta-feira, Primeiru-Ministru, Taur Matan Ruak, deklara katak nia mai ko’alia ho Prezidente Repúblika Francisco Guterres Lu Olo, kona-ba moras COVID- 19 no medida sira ne’ebé Governu implementa ona atu moras ne’e labele hadaet babeibeik iha Timor-Leste.
Asuntu ida seluk mak dada-sai fali karta pedidu demisaun husi Primeiru-Ministru ne’ebé hatama iha 24 fevereiru 2020.
Hafoin enkontru semanal entre titular rua ne’e, Primeiru-Ministru haruka karta ba Prezidente Repúblika hodi reafirma nia pedidu dada fali ninia karta pedidu demisaun.
Notísia Relevante: PM Taur Matan Ruak Retira Pedidu Demisaun
Jornalista : Cipriano Colo
Editór : Cancio Ximenes
