Diretór Ezekutivu Klínika Bairru Pité, Daniel Murphy, bainhira halo tratamentu ba pasiente. Imajen Jogerjo Guterres

DILI, 15 abríl 2020 (TATOLI)-Xefe Suku Bairru-Pité, João Batista da Costa Belo, hateten prezensa dr. Daniel Murphy ninian iha Timor-Leste hanesan eroi ba Timoroan tanba fó ona dedikasaun ba nasaun liuhosi asistensia saúde komunidade.

“Ema ida ne’ebé sai hanesan eroi ba saúde tenki estadu iha rekoñesementu ida di’ak ba nia tanba nia hatudu di’ak tomak ba komunidade no nasaun Timor-Leste,” katak, Autoridade Lokál Munisípiu Dili ne’e, ba Jornalista Sira iha Sede Suku, Bairru-Pité, kuarta (15/04/2020).

Notísia Relevante :Doutór Daniel Murphy Hakotu Iis

Fundadór Klínika Bairru-Pité ne’e fó ona kontribuisaun ba estadu liliu iha dezenvolvimentu área saúde tanba fó ona atendementu saúde ba ema hotu-hotu liliu ema ki’ak durante okupasaun Indonézia to’o ohin loron.

Notísia Relevante :Governu Hato’o Votu Pezár ba Dan Murphy Nia Mate

“Durante 1999 Indonézia atu sai husi ita-nia ra’in nia nafatin iha ne’e no nia mak ka’er klínika Bairru-Pité to’o ohin nia husik mundu ida ne’e,” tenik tan.

Notísia Relevante :Espoza PR Hato’o Sentida Kondolénsia ba Família Doutór Daniel Murphy

Nia observa katak durante ne’e matebian fó dedikasaun boot hodi atende ema ki’ak liliu sira ne’ebé sofre moras tubercoluse ka TBC no moras sira seluk tan.

“Hanesan Autoridade Komunitária ba suku Bairru-Pité ida ne’e ha’u fó apresia boot ba nia tanba biar ema rai seluk maibé nia hili liu Timor hodi halo tratamentu ba ita hotu iha ne’e ho responsabilidade ne’ebé mak boot tebes,” nia realsa.

Notísia Relevante :Saudozu Doutór Daniel Murphy Merese Hetan Kondekorasaun

Tanba ne’e Xefe Suku Bairru-Pité ne’e husu atu profisionál saúde sira iha Klínika ne’ebá presiza banati tuir ezemplu matebian nian hodi fó tratamentu saúde ba komunidade.

Notísia Relevante :Laboratóriu Nasionál Halo Teste ba Doutór Daniel Murphy Nia Mate-Isin

Iha parte seluk, Pasiente Isabel Pereira Fátima, sente soke bainhira rona notísia katak Doutór Daniel Murphy hakotu ona iis.

Nia hateten matebian durante ninia moris servisu ho responsabilidade boot hodi atende pasiente sira ho domin no pasensia.

“Iha tinan 2014 too 2015 ha’u moras durante tinan ida ha’u mai konsulta iha klínika ne’e tanba ha’u baixa iha HNGV doutór sira foti liman ona mai ha’u,tanba liman no ain mate hotu,” konta tuir pasiente ne’e ba Jornalista Sira ho triste iha Klínika Bairru-Pité.

Ho doutór nia tulun maka Isabel konsege rekupera hosi ninia moras hodi hamutuk ho família to’o ohin loron.

“To’o ikus nia fó tratamentu ha’u to’o ha’u nia ain ne’e di’ak no book an entaun nia dehan ba ha’u katak ho grasa Maromak nian moras di’ak ona entaun iha ne’e kedas ha’u agradese bo’ot ba doutór tanba durante fulan ida atende ha’u nia moras ne’e sai di’ak,”tenik tan.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here