Prezidente Repúblika,Francisco Guterres Lú Olo. Imajen Tatoli/António Gonçalves

 

DILI, 15 abril 2020 (TATOLI)–Prezidente Repúblika, Francisco Guterres “Lú Olo”, hato’o sentidu kondolénsia ba família saudozu Doutór Daniel Murphy. Sentidu kondolénsia ne’e, Prezidente Repúblika hato’o liuhosi komunikadu imprensa ne’ebé fó sai husi prezidénsia Repúblika.

“Ho tristeza-boot mak ha’u hatene kona-ba Doutór Daniel Murphy nia mate ne’ebé derrepente,” dehan PR Lú Olo,  liuhosi komunikadu, kuarta ne’e.

Doutór Daniel Murphy moris iha Iowa, Estadu Unidu Amerika, iha 23 setembru 1944. Dezde sedu hatudu an hanesan ema ne’ebé preokupa ho justisa sosiál.

Konsiénsia ida ne’e, nia hetan durante funu Vietname ne’ebé halo nia sai “ema-kontradór” ne’ebé iha fuan. La sai militar, nia harii fali klínika médika ne’ebé hakbesik liu ba imigrante sira no traballadór ki’ak sira iha Estadu Unidu Amérika.

Iha tinan 1970 nia rohan, Doutór Daniel Murphy ho nia família muda ba Moçambique hodi tulun moderniza medisina iha área rurál sira. No, iha Moçambique mak Daniel Murphy hatene kona-ba jenosídiu ne’ebé akontese iha Timor-Leste.

Tan labele halo buat ida iha altura ne’eba iha Timor-Leste, hafoin Suharto (antigu Prezidente Indonézia) rezigna-an, ne’ebé fó dalan hodi loke liutan territóriu okupadu ida ne’e, iha 1998, Doutór Daniel Murphy fa’an nia sasan hotu iha Estadu Unidu no muda mai Timor-Leste. Iha biban n’ebá, nia lori de’it mala-ki’ikoan ida, estetoskópiu ne’ebé sempre hamaluk nia no bola basket ida.

Iha periudu ida ne’e, Doutór Daniel Murphy sai médiku ne’ebé tau matan ba vitima sira hosi krueldade okupante sira. Tinan rua tuir mai, sai tinan ne’ebé aat liu iha nia moris, tan tau nia-an iha rizku no iha sofrimentu.

Vida hira mak Doutor Daniel Murphy la salva!

Tan nia serbisu no dedikasaun, Doutór Daniel Murphy hetan Prémiu Sérgio Vieira de Mello no kondekorasaun Medalla Ordem Timor-Leste hosi Prezidente Repúblika.

Iha tempu pás nia laran, Doutór Danieo Murphy dedika nia-an hodi harii klínika ida, ne’ebé koñesida hanesan “Klinika ba Ema Ki’ak” mak Klínika Bairru Pité.

Timoroan barak hetan tratamentu iha Klínika Bairru Pité kada tinan. Ba kolaboradór sira Klínika Bairru Pité, Prezidente Repúblika espresa nia gratidaun no nia laran susar.

“Ha’u apela atu imi simu ho dignu legadu ne’ebé notável hosi Doutór Daniel Murphy Oras ne’e, iha imi-nia liman no ha’u konfia iha imi. Ba família enlutada, iha Estadu Unidu, nia moris-fatin no iha Timor-Leste, rai ne’ebé iha nia fuan, ami-nia kondolénsia ne’ebé kle’an no ami-nia obrigadu barak,” dehan Prezidente Repúblika, Francisco Guterres “Lú Olo”.

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here