Empreza Pertamina Internasionál Timor oferese tanke bee ba CIGC. Imajen Tatoli/Florencio Miranda Ximenes

DILI, 15 abríl 2020 (TATOLI) – Empreza Pertamina Internasionál Timor, SA, oferese tanke bee lima ba Sentru Integradu Jestaun Krize (CIGC, sigla portugés) atu fase liman hodi prevene-an husi COVID-19.

“Ami husi Pertamina Internasionál Timor esforsu-an atu partisipa no suporta Timor-Leste hodi luta kontra COVID-19, hodi halo tuir meiu Saúde Mundiál no Ministériu Saúde Timor-Leste atu fase liman ho sabaun hodi prevene-an husi vírus ne’e”, tenik Diretór Ezekutivu Pertamina Intenasional Timór, Beny Harto Wijaya, hafoin entrega ekipamentu ne’e ba CIGC Iha Sentru Kovensaun Dili (CCD, sigla Portugés), kuarta ne’e.

Dirijente ne’e realsa, objetivu husi apoia ne’e atu populasaun hotu bele hatoman-an fase liman bebeik, molok hala’o atividade ruma atubele prevene-an husi surtu COVID-19.

“Ami fó apoia tanke bee lima, maibé ohin ami foin lori rua mai no ba oin ami sei lori tolu mai tan hodi kompleta ho sabaun no tissue atu ema fase liman ho Di’ak liu”, Dirijente ne’e promete.

Nune’e, nia apela ba sidadaun hotu atu hamutuk luta kontra COVID-19 atu labele hada’et maka’as liu iha Timor-Leste.

“Ita hotu hamutuk halo orasaun no luta kontra vírus ne’e liuhosi meiu saúde mundiál no Governu Timor-Leste nia, atu vírus labale hada’et maka’as liu iha Timor-Leste”, nia subliña.

Ba oin, Diretór Ezekutivu ne’e salienta, sei buka posível atu apoia Governu Timor-Leste hodi asegura populasaun husi surtu COVID-19.

Jornalista: Florencio Miranda Ximenes
Editora: Julia Chatarina

HAKEREK NO HATÁN

Please enter your comment!
Please enter your name here