Portavóz Gabinete Sentru Integradu Jestaun Krize (CIGC-sigla Portugés), Sergio Lobo.Imajen/Egas Cristovao

DILI, 15 abríl 2020 (TATOLI)- Governu Timor-Leste liuhosi servisu ekipa Sentru Integradu Jestaun Krize (CIGC-sigla portugés), ohin, rejista tan pasiente na’in-rua (2) pozitivu  ba surtu Coronavirus ka COVID-19.

Notísia Relevante : Pasiente COVID-19 Pozitivu Aumenta ba Ema Na’in Neen

Ho pasiente nain rua pozitivu ne’e hatudu katak dezde fulan marsu to’o loron 15 abríl 2020, tuku 12:00 Otl,  pasiente pozitivu COVID-19 hamutuk ona na’in-ualu (8), inklui na’in-ida (1) ne’ebé rekupera ona.

Portavós Sentru Integradu Jestaun Krize, Sergio Lobo, liuhosi konferénsia imprensa iha Sentru Mídia COVID-19 informa, suspeitu na’in rua ne’ebé rejista  ne’e hela iha fatin kuarentena Otél Katuas mai hosi fronteira Batugade iha loron 01 abril 2020, ne’ebé tula hosi Bis Bintang no Beckham ne’ebé Ministériu Saúde aluga.

“Ema totál ne’ebé sei hela iha kuarentena na’in-569, kompostu hosi iha Dili  na’in-456 no iha munisípiu sira  na’in-113. Suspeitu sira ne’ebé halo teste hamutuk 210, ema na’in-ualu (8) iha rezultadu pozitivu konfirmadu, pasiente na’in-ida, ita hatene nia di’ak ona, agora halo kuarentena iha uma,” informa Sergio Lobo.

Pasiente na’in hitu ne’ebé pozitivu COVID-19 mesak Timoroan de’it no  agora daudaun halo hela tratamentu fatin izolamentu iha Sentru Saúde Vera Krús, Caicoli, Dili, ho sira-nia kondisaun di’ak hela.

Eis Ministru Saúde ne’e hatutan, ekipa saúde mós daudaun halo hela teste amostra raan ba pasiente na’in neen (6) no ema na’in 31 sei hein rezultadu no na’in 167 maka negativu.

Nia esklarese katak, pasiente-sira ne’ebé sofre COVID-19 ne’e mai hosi grupu ida de’it no hela Otél Katuas ne’ebé tama liuhosi postu fronteira terrestre Batugade iha loron 01  abríl liubá.

Estudante sira-nee tula ho bis rua, mak hanesan Bis Bintang ho totál estudante feto na’in -8 no Bis Beckham tula estudante mane na’in-12 ho totál estudante hamutuk na’in 31 ne’ebé agora daudaun hela iha fatin kuarentena ida de’it.

Sergio Lobo hatutan, hosi totál estudante sira inklui motorista karreta rua no ajudante sira ne’e halo ona teste ne’ebé nia rezultadu hatudu katak  ba sira na’in hitu (7) pozitivu COVID-19, na’in neen (6) iha prosesu no na’in 24 sei hein rezultadu no motorista ho ajudante bis rua ne’e nia rezultadu teste raan negativu.

Sergio Lobo hodi  governu nia-naran apela mós ba povu Timor-Leste liu-liu família sira ne’ebé oan sofre pozitivu COVID-19 atu labele pániku no reza makaas hodi kontinua tau konfiansa ba serbisu governu liu-liu médiku-sira atu tau matan ba pasiente sira-nia saúde bele hakat liu dezafiu ne’e.

Iha parte seluk, Sentru Integradu Jestaun Krize mós rekoñese fasilidade saúde nian agora komesa menus, maibé Governu Timor-Leste halo ona esforsu hodi kontaktu ho nasaun doadór-sira iha tempu besik sei haruka aviaun boot tolu tula tan ai-moruk ho ekipamentu hodi fó apoiu ba Timor-Leste.

Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here