Operasaun iha liña fronteira terrestre hodi evita atividade ilegál tama-sai fronteira terrestre TL-RI. Imajen/Dok.Tatoli

DILI, 15 abríl 2020 (TATOLI)-Diretór Jerál Servisu Migrasaun Timor-Leste, Superintendente Polísia, Agostinho Gomes da Silva, apresia ho serbisu Unidade Patrullamentu Fronteira (UPF) hodi kaptura sidadaun hirak  ne’ebé mak kontinua halo viajen tama mai Timor-Leste liuhosi dalan ilegál.

Diretór Jerál Servisu Migrasaun, Superintendente Polísia Agostinho da Silva Gomes. Imajen/Eugenio Pereira

Superintendente Polísia, Agostinho Gomes, preokupa estudante-sira ne’ebé tama liu dalan ilegál bele lori surtu Coronavirus ka COVID-19 tama mai Timor-Leste.

 “Tuir lei, UPF kaer sira entrega ba ekipa saúde para halo ezaminasaun hodi garante ema ne’e tenke livre hosi COVID-19 depois kontinua entrega ba Servisu Migrasaun iha postu ne’ebá hodi verifika sira-nia identidade hodi entrega ba saúde no submete ba hela iha kuarentena,” hateten Agostinho Gomes ba jornalista, ohin, iha Servisu Migrasaun, Vila-Verde Dili.

Agostinho dehan, tanba sitasaun estadu emerjénsia, nune’e estudante-sira ne’ebé tama ilegál tenke ba hela iha fatin kuarentena, maibé antes ne’e, abitante-sira ne’ebé tama ilegál UPF kaptura entrega ba Servisu Migrasaun hodi prosesa tuir lei 11/2017.

Durante implementasaun estadu emerjénsia, Servisu Migrasaun mós konsege rejista abitante-sira ne’ebé tama ilegál hamutuk ema na’in-39 no dadus ne’e seidauk konta hosi dadus ne’ebé UPF kaptura.

Ema na’in-39 ne’ebé Migrasaun rejista tama área Timor-Leste hahú iha loron 27 marsu too ohin loron liu fronteira, Motain na’in-16, Salele-Suai na’in-sia (9), Bobometa, Oesilo-Oecusi na’in  -10, no Sakato na’in-haat (4) inklui sidadaun Indonézia ida (1).

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here