dr. Daniel Murphy bainhira halo konsulta médika ba pasiente iha Klínika Bairro Pité. Foto google

DILI,15 abríl 2020 (TATOLI)-Ekipa Médiku husi Laboratóriu Nasionál iha tersa kalan (14/04/2020) hasai ona amostra raan hosi Diretór Klínika Bairru-Pité, dr. Daniel Murphy hodi halo teste tanba ninia mate iha kedas situasaun rai-laran ne’ebé ligadu ho COVID-19.

Jestór Klínika Bairru-Pité, Inácio dos Santos hateten teste raan ne’e hodi justifika de’it motivu hosi Doutór nia mate tanba sofre COVID-19 ka lae ba prevene transmisaun surtu coronavirus ba ema seluk.

 Notísia Relevante :Doutór Daniel Murphy Hakotu Iis

Tanba antes ne’e, matebian sempre fó konsulta ba pasiente sira kada loron kuaze ema atus resin.

“Entaun ha’u kontaktu ba sira iha Laboratóriu Nasionál hodi teste ba doutór nia sampel para hatene,” informa, Inácio dos Santos ba Jornalista sira iha klínika Bairru-Pité, kuarta (15/04/2020).

Fundadór Klínika Bairru-Pité, Doutór Daniel Murphy, durante ne’e laiha sintoma ba moras ruma to’o nia hakotu iis iha tersa (14/04/2020).

“Tanba ne’e mak no ekipa laboratóriu na’in haat hasai kedas doutór nia sampel no kuarta (15/04/2020) sei fó sai kedas rezultadu negativu ka pozitivu,”tenik Inácio.

Jornalista   : Felicidade Ximenes

Editór         : Agapito dos Santos

HAKEREK NO HATÁN

Please enter your comment!
Please enter your name here