Prezidente Parlamentu Nasionál (PN), Arão Noé de Jesus da Costa Amaral. Imajen António Gonçalves

DILI, 15 abríl 2020 (TATOLI)—Kompozisaun foun ba Konsellu Imprensa (CI-sigla portugés) depende ba situasaun Estadu Emerjénsia tanba lei bandu labele iha reuniaun hodi halo votasaun.

Prezidente Parlamentu Nasionál, Arão Noé de Jesus da Costa Amaral, simu karta ida hosi Konsellu Imprensa kona-ba mandatu membru Konsellu Imprensa ne’ebé ninia mandatu sei ramata iha loron 10 maiu 2020.

Iha karta ne’e, nia haktuir, Konsellu Imprensa ho antesipadamente husu fulan ida antes tanba parlamentu mak iha kna’ar ida atu eleje membru na’in-rua ba iha konsellu ne’e.

Tuir nia, Konsellu Imprensa mós koloka situasaun ida tanba Konsellu Imprensa ne’e membru na’in-rua tenke mai hosi reprezentante jornalista sira entaun koloka mós situasaun ida katak tuir lei labele reuniaun para hodi halo eleje membru sira.

“Ha’u hanoin parlamentu nian laiha problema tanba plenária bele halo iha kualkér momentu maibé só ke liga ba membru sira seluk indijita reprezentante hosi jornalista sira tanba jornalista sira tenke iha reuniaun ida para halo votasaun. Ida ne’e karik sei difikulta prosesu bainhira Estadu Emerjénsia ne’e prolonga,”  dehan Arão Noé de Jesus da Costa Amaral ba jornalista sira, iha Parlamentu Nasionál, kuarta ne’e.

Prezidente Parlamentu Nasionál sei husu pareser legál ba asesór legál sira iha parlamentu ein-relasaun ba asuntu ne’e katak kompozisaun Konsellu Imprensa mantein lai hodi hein to’o situasaun normál nune’e haree kandidatura sira ho didi’ak.

“Se Estadu Emerjénsia ne’e hotu iha 26 abríl, ha’u hanoin tempu iha para bele iha reuniaun. Se prolonga ha’u hanoin laiha dalan entaun situasaun sira-ne’e presiza análiza hodi haree ba ninia prosesu,”  nia dehan.

Entretantu, tuir Lei Komunikasaun Sosiál nú 5/2014, artigu 45.º (kompozisaun Konsellu Imprensa hamutuk membru na’in-lima), alínea a esplika, reprezentante jornalista na’in-rua ne’ebé sira hili tiha ona liuhosi eleisaun. Alíneia b hosi artigu ne’e dehan reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun.

Nune’e mós alínea c hosi artigu 45 ne’e hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.

Iha alínea d hosi artigu 45 ne’e dehan, membru sira Konsellu Imprensa hili entre sira-nia Prezidente.

Entretantu, Lei Komunikasaun Sosiál artigu 46.º, hateten mandatu membru Konsellu Imprensa ba tinan haat bele hafoun dala ida de’it.

Jornalista : Evaristo Soares Martins

Editór        : Cancio Ximenes

HAKEREK NO HATÁN

Please enter your comment!
Please enter your name here