Komandante PNTL Sentru Formasaun Polísia, Superintendente Xefe Polísia, Arquiminio Ramos. Imajen Imajen Espesiál.

DILI, 15 abril 2020 (TATOLI)—Hamutuk ita kombate COVID-19! Misaun ne’e la’ós Estadu no Governu Timor-Leste ninian mesak de’it maibé timoroan hotu, liuliu entidade hotu-hotu nia kontribuisaun atu bele kombate COVID-19 iha Timor-Leste.

Tanba haree ba atualidade, liuliu iha tersa (13 abril 2020), liuhosi anúnsia formál ne’ebé fó sai hosi Portavós Sentru Integradu Jestaun Krize informa nain neen konfirmadu pozitivu COVID-19, fó inspirasaun ba artista múzika no atuál Komandante PNTL Sentru Formasaun Polísia, Superintendente Xefe Polísia, Arquiminio Ramos, hodi hakerek múzika lahó titulu ba COVID-19 hodi hananu no haklaken liuhosi ninia varanda facebook.

“Ha’u akompaña notísia dehan kazu pozitivu aumenta, maibé movimentu ema-nian maka’as nafatin. Entaun, ha’u hanoin halo to’ok múzika ne’e. Karik, ajuda fahe mensajen liuhosi ha’u-nia talenta ida seluk hanesan múziku, entaun koko kedas ho ha’u-nia keyboard ka organ. Bainhira tempu deskansa han meudia nian, ha’u haree ba furak entaun públika iha facebook. Afinál, ema like (gosta) no share (fahe) barak. Vídeo primeiru, ha’u haree ema 8000 mak haree. Entaun, ha’u foin halo edisaun fali mós kuaze besik ema 5000 ona mak haree no kuaze ema 4000 mak like,” dehan Múziku no Eskritór, Arquiminio Ramos, ba TATOLI liuhosi rede sosiál, kuarta ne’e.

Razaun seluk, nia hakerek múzika ba COVID-19, maski nia hakerek ona artigu ho titulu “COVID-19 Haree Hosi Implementasaun Lei seguransa Nasionál” ne’ebé públika iha jornál no mídia onine balun, maibé ema ladún lee entaun nia iha hanoin atu hato’o mensajen badak liuhosi múzika.

“Ha’u hanoin hakerek múzika ne’e tanba ha’u hakerek uluk artigu hodi públika iha jornál no mídia online balun maibé ema laduun lee no laiha mudansa ba komportamentu sosiedade nian. Entaun, ho ida ne’e maka dudu ha’u atu halo tan múzika para ema bele akompaña. Hanoin ho mensajen liuhosi múzika mak ha’u bele kontribui di’ak liután ba luta hodi kontra no kombate COVID-19 ne’e,” dehan múziku ne’ebé moris iha Ainaru, 27 jullu 1980 ne’e.

Intensaun ida de’it! Liuhosi muzika simples ne’e, eskritór ne’e hakarak hato’o mensajen liuhosi múzika hodi bele muda populasaun Timor-Leste nia komportamentu hodi hakmatek iha uma. Liuhosi mensajen múzika nian dalaruma bele prevene án hosi transmisaun Coronavirus (COVID-19) ne’e tanba seidauk iha aimoruk atu kura moras aat ne’e.

“Iha letra balun ha’u hakerek ‘Se ó hadomi ó-nia nasaun, se ó hadomi ó-nia án, tuur nonook iha uma, salva ó-nia án no ó salva ó-nia nasaun’ ne’e, tanba ema ida-idak kuidadu án ne’e sei kuidadu Nasaun, tanba kuidadu án la hetan moras no Nasaun mós la hetan moras. Estadu labele gasta osan barak liu ba surtu COVID-19 ida ne’e no Nasaun presiza ema atu serbí. Ezemplu, lider istóriku hanesan aset Nasaun nian ne’ebé ita sei presiza sira. Se da’et hotu ba sira, perigu mós ba ita-nia Nasaun Timor-Leste,” dehan Komandante PNTL Sentru Formasaun Polísia, Superintendente Xefe Polísia, Arquiminio Ramos, ne’ebé hahú nia kareira nu’udar tradutór ba UNAMET no tama polísia iha 20 maiu 2002 ne’e.

Iha ninia varanda rede sosiál, múziku be hatolun ona album múzika tolu hamutuk ho grupu múzika Leuidi Group (Ainaru) ne’e haktuir; “Lalika preokupa ho nia múzika no ba ha’u-nia lian tanba seidauk hala’o gravasaun iha estudio maibé halo tuir bá, mensajen ne’ebé ha’u hato’o”. Foufoun múzika ne’e nia halo lahó titulu maibé nia rona sujestaun hosi jornalista balu, to’o ikus nia foti desizaun hodi tau múzika ne’e ho titulu “Kombate Coronavirus”;

Kombate Coronavirus

Corona mai la fihir ema
Ó atu riku no ó ki’ak
Ita hotu iha hotu risku

Sai ba li’ur uza máskara
Kaer sasán uza luvas
Kombate ona COVID-19

Nasaun avizu ó la rona
Polísia si’ak ó la liga
Bainhira loos moris ho konsiénsia

Reff:
Se ó hadomi ó-nia nasaun
Se ó hadomi ó-nia án
Tuur nonook iha uma
Salva ó-nia án
Ó kumpre ona regras
Ó salva ó-nia nasaun.

Karik hakerek múzika ne’e tanba la tauk surtu COVID-19, nia hatán, sente tauk tebes duni maka hahú hosi nia halo prevensaun uluk hafoin sensibiliza ba maluk polísia sira iha checkpoint ne’ebé nia dalaruma akompaña direta ninia membru sira. Nia sente tauk no sente seguru tanba nia mós uluk eskola ba infermeiru ne’ebé toman ona ho vida ijiéne.

“Maski tauk maibé ha’u sente kontente tanba mensajen ne’e bele hatutan no ha’u sente bele kontribui ba ha’u-nia nasaun liuhosi talenta ne’ebé hau iha. Tanba, ema balu akapta lalais mensajen sira ho múzika,” nia dehan.

Notísia Relevante: COVID 19 Haree Hosi Implementasaun Lei Seguransa Nasionál

Jornalista : Osória Marques

Editór       : Cancio Ximenes

1 KOMENTÁRIU

HAKEREK NO HATÁN

Please enter your comment!
Please enter your name here