Primeiru-Ministru, Taur Matan Ruak, prezide Reuniaun Konsellu Ministru iha CCD, kuarta (15/04). Imajen Tatoli/Egas Cristovão

DILI, 15 abríl 2020 (TATOLI) Governu liuhosi reuniaun Konsellu Ministru (KM), aprova dekretu ezekusaun ba fundu COVID-19 ho montante millaun $150 ne’ebé hetan ona promulgasaun husi Prezidente Repúblika, Francisco Guterres ‘Lú-Olo’.

Dekretu Governu ne’e aprezenta husi Ministra Finansa ein ezersísiu, Sara Lobo Brites, durante reuniaun ezekutivu.

Fundu COVID-19 kria liuhosi lei númeru 2/2020, 6 abríl no regula husi Dekretu Lei númeru 12/2020, 14 abríl.

“Objetivu husi dekretu ezekusaun ne’e, atubele estabelese regra no prosedimentu iha ezekusaun  ba atividade ne’ebé maka mai husi ministériu sira, iha ámbitu prevensaun no kombate ba COVID-19. Entaun regra ne’ebé hatuur maka proposta hotu husi ministériu sira sei kanaliza ba iha konsellu interministeriál hodi hetan apresiasaun, hafoin husi konsellu hato’o ba komisaun fundu COVID-19 hodi bele revee no prepara nia kabimentu orsamentu, no mós prepara pagamentu depende ba pedidu hosi ministériu idaidak”, relata Sara Lobo hafoin reuniaun KM, iha Sentru Konvensaun Dili (CCD, sigla portugés), kuarta ne’e.

Notísia Relevante: KM Aprova Dekretu-Lei Regula Fundu COVID-19 Millaun $150

Atuál Vise-Ministra Finansa ne’e esplika, bázikamente dekretu ne’e ko’alia liu kona-ba oinsá atu operasionaliza fundu ne’e rasik.

Nune’e mós, kona-ba fundu COVID-19 tanba  ezekusaun ein jerál ne’e regula ona husi dekretu ezekusaun 2019 no mós dekretu ezekusaun ba Dotasaun Orsamentu Temporáriu (DOT) nian, ne’ebé dekretu ezekusaun ne’e própriu ba fundu COVID-19 nian.

Sara Lobo refere liután, kona-ba fundu ne’e, haree ba proposta husi ministériu idaidak bazeia ba sira ninia kna’ar.

“Ezemplu hanesan Ministériu Saúde ne’ebé iha kna’ar hanesan frontline, liuliu iha akizisaun ekipamentu, ai-moruk, atendimentu ba kuarentena, no atendimentu sira seluk tan, hanesan mós Ministériu Defeza no Seguransa, inklui ministériu sira seluk ne’ebé inderetamente iha ligasaun ho ba programa ida ne’e”, nia akresenta.

Tuir governante ne’e, atu evita  ministériu idaidak halo ninia proposta, maka kanaliza hotu proposta ba Sentru Integradu Jestaun Krize (CIGC, sigla portugés).

“Sira maka prepara hotu proposta iha programa no sub-programa, hafoin aprezenta ba konsellu interministérial hodi revee no halo apresiasaun hafoin hato’o ba iha konsellu fundu COVID-19 nian atu operasionaliza ninia ezekusaun”, nia realsa.

Governu Hakarak Estabelese Prosesu ho Forma Transparente

Maski dekretu ne’e hetan aprovasaun, maibé sujeitu ba alterasaun kiik balun, liuliu durasaun tempu ne’ebé maka komisaun presiza atu prosesa pedidu ruma hosi ministériu sira.

“Komisaun servisu hamutuk ho Sentru Integradu Jestaun Krize no mós komisaun interministeriál, ita hakarak estabelese prosesu ida ho forma transparente. Embora fundu ne’e ninia prosesu sei la’o hela, maibé prova hela ninia kuadru legál  akizasaun ba kompra sira, Governu realiza tiha ona antes, tanba tenke duni tuir tempu atubele hetan sasán sira ne’e lalais”, nia salienta.

Nia subliña, iha ona despeza lubuk ida liuhosi fundu rezerva kontijénsia. Tanba ne’e bainhira fundu ne’e operasionaliza ona, Governu sei re-ajusta filafali despeza ne’ebé akontese ona mai hotu iha fundu, hanesan despeza ne’ebé ligadu ho fundu.

Governu tenta halo ho ezekusaun ho transparénsia atu ema hotu bele asesu ba informasaun tanba fundu ne’e destinadu ba de’it COVID-19 nian.

“Ministériu Finansa (MF) haree hela forma atubele divulga informasaun sira ne’e ho forma ida transparente, la’ós de’it ba públiku maibé mós Parlamentu Nasionál, liuliu Komisaun C Finansa Públika hodi halo akompañamentu ba ezekusaun fundu refere”, nia akresenta.

MF sei haree posibilidade atu publika ezekusaun fundu ne’e liuhosi meiu Portál Transparénsia.

“Opsaun ne’e ami haree hela, maibé portal ne’e publika de’it númeru. Ami hakarak liu fó informasaun la’ós de’it númeru maibé ninia atividade no ninia impaktu ba iha ezekusaun”, nia dehan tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here