Ministru Obra Públika, Salvador Eugênio Soares Dos Reis Pires. Imajen Tatoli/Florencio Miranda Ximenes

DILI, 15 abríl 2020 (TATOLI) – Ministru Obra Públika, Salvador Eugênio Soares Dos Reis Pires,  informa daudaun ne’e kliente Eletricidade de Timor-Leste (EDTL) hamutuk 100.000 maka hetan ona subsídiu pre-pagu eletrisidade $15 ba kada kliente, liuhosi operadór telekomunikasaun Timor-Telecom, Telemor no Telkomcel, husi totál kliente 160.555 ne’ebé mak sei hetan.

“Tuir dadus husi operadór telekomunikasaun, Timor-Telecom kuaze kliente hamutuk 37.000-resin no ohin ha’u simu tan dadus husi Telemor nian kuaze 67.000, signifika 100.000-resin mak asesu ona subsídiu pre-pagadu no besik hotu ona. Maibé operadór Telkomcel nia dadus mak ha’u seidauk simu”, tenik Ministru Salavador ba Agência Tatoli, iha Sentru Konvesaun Dili (CCD, sigla portugés), kuarta ne’e.

Notísia Relevante: Kliente EDTL Apresia no Agradese ba MOP

Ho nune’e, Ministru ne’e kontinua apela ba públiku atu kontinua manda mensajen ba operadór telekomunikasaun tolu, liuhosi númeru hotline, tanba subsídiu ne’e válidu to’o loron 26 abríl ne’e.

“Ha’u apela ba kliente eletrisidade sira karik sé mak seidauk manda mensajen, bele manda mensajen ba númeru hotline 12150 atu asesu ba subsídiu pre-pagu eletrisidade”, nia akresenta

Meiu atu asesu subsídiu pre-pagu eletrisidade maka kliente sira hakerek EDTL #númeru kontadór no manda númeru hotline 12150 ne’ebé bele livre ba Sim Card Timor-Telecom, Telemor no TelKomcel.

Governante adianta, kliente EDTL balun bainhira la manda mensajen to’o períodu Estadu Emerjénsia termina, hatudu katak sira laiha ona direitu atu asesu subsídiu pre-pagu ne’e.

Polítika Subsídiu ne’e, tuir Salvador, ba situasaun iha grave COVID-19, bainhira Governu deside hala’o estensaun ba Estadu Emerjénsia, maka parte Ministériu Obra Públika (MOP) sei haree fali subsídiu ne’e.

“Ita haree depende ba gravidade ka Governu hakarak estende, maibé politika ba subsídiu pre-pagu eletrisidade no bee-moos durante períodu Estadu Emerjénsia sei termina iha 26 abríl”, nia afirma.

“Bainhira Governu deside estende tan Estadu Emerjénsia, entaun ami sei halo despaisu tan hodi bele haree fali subsídiu ne’e”, nia realsa.

Ministru Salavador refere liután, ba subsídiu bee-moos ne’e hahú válidu bainhira Prezidente Repúbliku dekreta Estadu Emerjénsia, ne’ebé fulan-abríl nian, Diresaun Jerál Água no Saneamentu (DGAS, sigla portugés) sei la aprezenta tarefa ba kliente sira atu selu.

“Ami nia subsídiu ba kliente sira ne’ebé tama ona Sistema DGAS no EDTL atu labele sai ba forma hodi halo pagamentu no sosa pre-pagu,tanba ne’e hanesan meiu ida atu prevene-an husi COVID-19”, nia afirma liután.

Tuir despaisu MOP númeru Ref. 581/MOP/III/2020, intensaun fó subsídiu naun-finanseira ba kliente hamutuk 160.555, atu hamenus movimentasaun kliente konsentra iha fatin hola pulsa atu kontribui salva saúde povu-nian, ba prevensaun kontajia COVID 19, ne’ebé aliña ho objetivu Estadu Emerjénsia.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here