Ministru Ensinu Superiór, Siénsia no Kultura, Longuinhos dos Santos. Imajen/TATOLI

DILI, 15 abríl 2020 (TATOLI)-Governu liuhosi Ministru Ensinu Superiór Siénsia no Kultura (MESSK), Longuinhos dos Santos informa prosesu pagamentu subsídiu ba estudante Timoroan iha rai li’ur sei atraza uitoan tanba sei hein dadus kona-ba totál estudante la’ós bolseiru iha Indonézia hamutuk na’in hira.

Daudaun ne’e MESSK liuhosi Gabinete Apoiu Estudante servisu hamutuk ho adidu edukasaun Timor-Leste iha Indonézia, Ministériu Negósiu Estranjeiru no Kooperasaun aselera hela servisu hodi verifika lista estudante iha Indonézia hodi konklui iha tempu badak.

Notísia Relevante :Governu Sei Atribui Subsídiu ba Estudante Timor-oan iha Estranjeiru

Maibé hatan kona-ba estudante bolseiru hosi Governu iha diaspora, Governante ne’e esplika hamutuk estudante 778. Tanba ne’e maka prosesu pagamentu sei akontese hafoin governu finaliza ona prosesu verifikasaun dadus.

“Servisu ida ne’e mak governu hein hela husi adidu sira kuandu aprezenta ona MESSK no Ministériu Negósiu Estranjeiru no Kooperasaun maka sei hare fila fali depois mak sei aprezenta,” hateten Ministru Longuinhos dos Santos, ba Jornalista Sira iha Sentru Konvensaun Dili, hafoin reuniaun Konsellu Ministru, kuarta (15/04/2020).

Governante ne’e hatutan seidauk fó prazu tempu ba estudante sira atu bele simu ona subsídiu ne’e tanba sei hein dadus ikus hosi ekipa verifikasaun iha Indonézia.

Jornalista : Tomé Amado

Editór     : Agapito dos Santos

HAKEREK NO HATÁN

Please enter your comment!
Please enter your name here