Primeiru-Ministru, Taur Matan Ruak, prezide Reuniaun Konsellu Ministru iha CCD, kuarta (15/04). Imajen Tatoli/Egas Cristovão

DILI, 15 abríl 2020 (TATOLI) – Governu hato’o votu pezár ba Daniel Murphy ne’ebé hakotu-iis iha tersa (14/04) kalan tuku 20:30 iha matebian ninia rezidénsia, Praia dos Coqueiros, Dili.     

“Ho laran triste no laran-dodok tebes maka Governu Repúblika Demokrátika Timor-Leste simu notísia kona-ba Daniel Murphy nia mate, médiku Norte-Amerikanu ne’ebé hakotu iis tamba moras fuan iha loron 15 abríl iha Dili”, haktuir nota ofisiál husi ezekutivu ne’ebé Agência Tatoli asesu, kuarta ne’e.

Notísia Relevante: Doutór Daniel Murphy Hakotu Iis

Iha nota ne’e afirma rekoñesimentu Governu Timor-Leste, ba kontribuisaun ne’ebé boot no dedikasaun husi Daniel Murphy hodi fó tratamentu ba ema mukit sira, sei lahaluha no sei hanoin nafatin no nia simu respeitu, admirasaun no mós venerasaun sira husi povu Timor-Leste.

“Iha momentu ida-ne’e, Governu Repúblika Demokrátika Timor-Leste hato’o ninia laran-triste ba família estimadu Doutór Daniel no agradesementu husi nasaun ida ne’ebé mak sempre agradese”, subliña nota imprensa ne’e.

Dezde 1998, dr. Daniel ho naran koñesidu Dan Murphy, hanesan fundadór ba Klínika Bairro Pité no durante ne’e mantein atividade no tratamentu ba ema mukit sira iha Timor-Leste.

Loron-loron Klínika Bairro Pité atende pasiente barak, hanesan fó tratamentu ba moras leukimia, tuberkuloze HIV-SIDA no moras grave no kma’an seluk tan.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here