Transporte hosi Indonézia kontinua tula sasán nesesidade báziku tama Timor-Leste iha Postu Integradu Fronteira Motain- Batugade. Imajen/Eugénio Pereira

DILI, 15 abríl 2020 (TATOLI) – Diretór Jerál Servisu Migrasaun Timor-Leste, Superintendente Polísia, Agostinho Gomes da Silva, informa, postu fronteira terrestre Batugade-Motain, loke de’it hodi simu importasaun sasán nesesidade báziku.

Notísia Relevante : Governu La Autoriza Ona Timoroan Fila Mai TL

Iha kuarta (15/04/2020), fronteira terrestre postu Batugade-Motain, loke ba transporte ne’ebé tula sasán importasaun nesesidade báziku hosi Kupang-Indonézia mai Timor-Leste.

Dekretu governu 6/2020, 8 abríl, haktuir katak, desizaun taka fronteira hodi la autoriza simu viajen Timoroan no ema estranjeiru mai territóriu Timor-Leste hodi hamenus risku propagasaun surtu Coronavirus ka COVID-19.

“Sasán nesesidade báziku-sira ne’ebé tama liu fronteira só bele halo tranzasaun iha zona livre entre Timor-Leste ho Indonézia ho durasaun tempu oras rua, hahú tuku 10:00 too  tuku 12:00 Otl,” informa Agostinho Gomes, ba jornalista, ohin, iha Servisu Migrasaun, Vila-Verde, Dili.

Nia hatutan, sasán sira ne’ebé tama ekipa Servisu Migrasaun koopera ho Autoridade Aduaneira ka Alfándega Timor-Leste mak halo kontrolu direita.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here