UPF halo operasaun iha liña fronteira terrestre. Imajen/Eugénio Pereira

DILI, 15 abríl 2020 (TATOLI) – Unidade Patrullamentu Fronteira (UPF) kaptura estudante Timoroan na’in-lima (5) ne’ebé tama ilegál hosi Atambua-Indonézia mai Timor-Leste no entrega ona ba ekipa Médiku Jerál COVID-19 iha Kuarentena Batugadu hodi halo teste ba sira-nia kondisaun saúde.

Estudante na’in-lima kompostu hosi feto na’in-ida (1) no mane na’in-tolu (3), ohin, tuku 04:00 madrugada, UPF kaptura iha área Tali-Laran Fronteira Timor-Leste ho Indonézia.

Estudante sira ne’e mai hosi Provínsia Bandung, Jogjakarta no Jakarta -Indonézia, nu’udar fatin afetadu ba surtu Coronavirus ka COVID-19.

Komandante UPF, Superintendente João Belo dos Reis. Imajen/Media PNTL

Komandante UPF, Superintendente João Belo dos Reis dehan, estudante sira ne’e halo viajen ilegál mai Timor-Leste, tanba Governu Timor-Leste hasai ona desizaun hodi taka pontu entrada entre Timor-Leste no Indonézia nian.

UFP halo kedas identifikasaun ba estudante sira-ne’e iha dokumentu hanesan pasaporte, kartaun eleitorál no Billete Identidade (BI) kompletu, maibé tanba fronteira taka sira deside liu dalan ilegál.

“Hodi kalan ekipa kaptura mós estudante na’in haat no ohin dadeer tuku 04:00 madrugada, ami  mós kaer tan estudante ida iha liña fronteira,” dehan João Belo, ba jornalista.

Komandante UPF ne’e mós apela no klarifika ba públiku Timor-Leste atu labele pániku no rona rumoris kona-ba ema ilegál tama barak Timor-Leste hodi transmite fali surtu Coronavirus ka COVID-19 ba sosiedade Timor-Leste ne’e la loos.

UPF rasik durante ne’e kria kooperasaun di’ak tebes ho serbisu intelijénsia Indonézia nian hodi fó informasaun ba UPF kaptura sidadaun Timoroan ne’ebé hakat ilegál liu fronteira Batugade, Covalima no Oe-Cusse nian.

UPF mós apela ba Timoroan sira ne’ebé hela iha liña fronteira atu koopera ho UPF hodi kontrola no kaptura abitante ho estudante Timoroan sira ne’ebé tama ilegál mai Timor-Leste.

UPF mós kaptura abitante Timoroan balun ne’ebé lori karreta tula karau atu fa’an ba sidadaun Indonézia no parte UPF kaptura iha liña fronteira Fatumea nian. Kazu ne’e UPF entrega ona ba parte PNTL Covalima hodi prosesa.

Kazu hanesan, akontese mós iha Oe-Cusse UPF kaptura sidadaun Indonézia balun ne’ebé tenta lori mina ilegál mai Timor-Leste.

Antes ne’e, Konsul Timor-Leste ba Kupang, Jesuíno dos Reis Matos “Zito” deklara, estudante na’in-haat mai hosi Indonézia ba Konsul Atambua maka ajuda hodi lori sira ba teste saúde iha Ospitál Atambua hatudu rezultadu negativu no husu estudante-sira atu hela iha konsuladu Atambua, maibé estudante sira-ne’e deklara atu ba hela iha família sira nia uma iha Atambua, maibé ikus mai sira halo fali viajen ilegál tama mai Timor-Leste.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here