Imajen/Mídia Gabinete Apoiu Atividade Konjuga Prezidensia Repúblika.

DILI, 15 abril 2020 (TATOLI)–Espoza Prezidente Repúblika, Cidália Nobre Lopes Mouzinho Guterres, hodi família nia naran ho Prezidente Repúblika hato’o sentidu kondolénsia ba família matebian Doutór Daniel Murphy.

“Hakfodak no sente triste tebes simu imformasaun kona-ba Doutór Daniel Murphy hakotu iis ou husik hela mundu ne’e. Ha’u la espera katak Doutór Daniel Murphy husik hela família ho Klinika Bairru Pité ho ita hotu iha tempu ida defisil hanesan ne’e,” haktuir Inan Nasaun, Cidália Nobre Lopes Mouzinho Guterres, liuhosi komunikadu imprensa ne’ebé Ajénsia TATOLI, kuarta ne’e.

Inan Nasaun ne’e mos sente laran triste tebes tanba iha ninia konversa ikus ho Doutór Daniel Murphy iha fulan ida liu ba, sira ko’alia asuntu barak liga ba nutrisaun ho planu oinsá atu realiza mehi sira ne’ebé Daniel Murphy hakarak atu realiza ba povu ida ne’e liuhosi dedikasaun nu’udar médiku.

Doutór Daniel Murphy nu’udar fundadór ba Klínika Bairru Pité, hakotu ona iis iha loron tersa (14/04/2020) iha nia rezidénsia Praia dos Coqueiros, Dili, iha oras tuku 20:30, tanba hetan moras fuan (atake cardiaco).

Doutór Daniel Murphy nu’udar sidadaun amerikanu ne’ebé hala’o misaun iha Timor-Leste liu tinan 20.

Klínika Bairru Pite koñesidu mós ho naran Klínika Lanud harii husi Doutór Daniel Murphy iha tinan-1999 hodi fó tratamentu saùde ba pasiente sira ho gratuita. Loron-loron Klínika Bairru Pité fó tratamentu saúde ba maternidade no labarik sira, vasinasaun, tuberculocis, malária, dengue, tratamentu no diagnoza HIV/SIDA, nehan, promosaun saúde, formasaun ba pesoál saúde.

Klínika Bairru Pité ne’e iha laboratóriu no farmasia hodi fó asisténsia ba nesesidade pasiente sira-nian.

“Obrigadu wain Doutór Daniel Murphy ba ita-nia dedikasuan tomak ba povu no nasaun Timor-Leste iha era okupasaun to’o ohin loron. Deskansa ho Hakmatek Doutór Daniel Murphy iha Aman Maromak Nia Kadunan Santo,” Cidália agradese liuhosi komunikadu.

Notísia relevante: Saudozu Doutór Daniel Murphy Merese Hetan Kondekorasaun

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here