Tribunál Distritál Dili. Imajen/TATOLI

DILI, 15 abríl 2020 (TATOLI) – Iha loron 12 abríl, foin lalais ne’e, abitante-sira iha area Merkadu Taibessi, Dili, hakfodak no halai ba haree kondisaun fízika lezada Z ne’ebé nia-ain kanek ho ran maka’as tanba rezulta hosi haksesuk malu entre lezada Z ho arguida AS.

Tuir faktu ne’ebé arrola hosi Ministériu Públiku katak, haksesuk malu ne’e akontese tanba de’it  arguida AS deskonfia katak lezada Z mak  lori-lia ba viziñu-sira hodi konta nia-vida. Tanba ne’e, arguida AS la aguenta hodi ba husu tuir to’o diskute malu hodi halo arguida nervozu lori tudik sona kedas ba lezada Z nia-ain.

Kazu ne’e, ohin, halo audiénsia primeiru interrogatóriu  iha Tribunál Distritál Dili (TDD) ne’ebé Ministériu Públiku akuza arguida AS ho krime rua; ofensa integridade fízika simples, previstu no punidu iha artigu 145, númeru 1 kódigu penál Timor-Leste, no nia moldura penál hetan pena prizaun tinan tolu  ka multa, no krime arma branka iha lei númeru 5/2017.

Liuhosi audiénsia ne’e, Juis singular Afonso Carmona, aplika medida koasaun aprezentasaun periódika ba arguida AS tanba Tribunál haree ba fundamentu hosi sirkunstánsia sira no arguida nia deklarasaun ho forma diferente ho akuzasaun MP nian.

Tuir defeza ne’ebé fó asisténsia legal ba arguida AS, Sebastião Amado de Almeida, katak, momentu ne’ebá arguida laiha intensaun atu sona lezada, maibé tanba lezada ho nia maluk nain-rua seluk ka’er metin arguida ‘riba’ tun ba rai, nune’e arguidu hanesan halo auto-defeza ba nia-an rasik.

“Hare hosi ne’e mak Tribunál aplika medida ne’e, kada fulan ida arguida tenke aprezenta-an dala rua ba eskuadra polísia nian ne’ebé besik durante fulan tolu,” informa Sebastião Amado de Almeida.

Tuir prosesu legál, bainhira iha desizaun primeiru interrogatóriu parte defeza la satisfás ho desizaun tribunál nian, bele halo rekursu durante prazu loron-15.

Audiénsia julgamentu ne’e, Ministériu Públiku reprezenta hosi Prokuradór Domingos Barreto no arguida hetan asisténsia legál hosi Defensór Públiku Sebastião Amado de Almeida.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here