Governu liuhosi ekipa konjunta COVID-19, ohin, entrega tan abitante na’in 14 ba família ida-idak, hafoin kumpre tiha kuarentena obrigatóriu durante loron-14 iha fatin Kuarentena Otél YQ, Rai-Kotu, Dili, kuarta (15/04/2020). Imajen/Domingos Piedade

DILI, 15 abríl 2020 (TATOLI) – Governu liuhosi ekipa konjunta COVID-19, ohin,  re-integra tan abitante na’in 14 ba família ida-idak, hafoin kumpre tiha ona kuarentena obrigatóriu durante loron-14 iha fatin Kuarentena Otél  YQ, Rai-Kotu, Dili.

Notísia Relevante : Governu Re-Integra Tan Ema Na’in-124 iha Kuarentena bá Sosiedade

Abitante lubun ne’e mai hosi Indonézia, maioria Estudante  tama mai Timor-Leste liuhosi postu fronteira Batugade, Bobonaro, iha loron 01 abríl 2020.

Lista ne’ebé iha hosi ekipa konjunta COVID-19 katak, abitante na’in-14 ne’e kompostu hosi na’in-lima (5) hosi Munisípiu Dili, Viqueque na’in-rua (2), Liquiça na’in-tolu (3), Bobonaro na’in-ida (1), Lautem na’in-rua (2) ho Manifahu na’in-ida (1).

Diretór Nasional Finansas Munisípais iha Ministériu Estatál, Valente de F. Miranda. Imajen/Domingos Piedade

Iha serimónia re-integrasaun ne’e, Diretór Nasional  Finansas Munisípais iha Ministériu Estatál, Valente de F. Miranda, apela ba abitante na’in-14 atu kontinua kumpre regra no prosedimentu hotu ne’ebé fó-sai hosi Ministériu Saúde no Organizasaun Mundiál Saúde (OMS) hodi prevene-an no prevene sosiedade hosi propagasaun Coronavirus ka COVID-19.

Lori  Governu nia-naran, Valente de F. Miranda,  hato’o agradese ba hotu-hotu nia kolaborasaun durante hela iha kuarentena, kumpre orientasaun hotu hosi ekipa konjunta hanesan Ministériu Saúde, Polisia Nasionál Timor-Leste (PNTL), FALINTIL-Forsa Defeza Timor-Leste (F-FDTL) no seluk-seluk tan.

Diretór Jerál Apoiu Jurídiku no Kontajiozu, Belarmino da Silva Pereira. Imajen/Domingos Piedade

Iha biban hanesan, Diretór Jerál Apoiu Jurídiku no Kontajiozu, Belarmino da Silva Pereira, informa katak, nu’udar estudante ne’ebé mak mai hosi rai afetadu tenke kuarentena obrigatóriu durante loron-14  nia laran tanba perigu hosi propagasaun COVID-19.

“Ha’u hanoin atu prevene hosi COVID-19 mak difisil, maibé buat ne’ebé mak ita boot sira tenke halo mak tenke suporta hosi ita nia hahalok no kumpre regra-sira atu hadook tiha hosi surtu ne’e,” Belarmino Pereira hateten.

“Ho Maromak Nia grasa. Imi hotu ne’ebé kumpre kuarentena obrigatóriu iha YQ livre hosi COVID-19,” hateten Belarmino Pereira.

Nia parte husu ba abitante na’in-14 ne’e atu aplika fila bali buat ne’ebé sira aprende durante iha kuarentena laran ba iha família no sosiedade, liu-liu mantein  distánsia sosiál, distánsia fíziku, fase liman ho sabaun no selu-seluk tan.

Abitante hirak-ne’e simu kedas sertifikadu hosi MS hodi hateten katak, sira-hirak ne’e livre hosi sintoma surtu COVID-19 durante kompre kuarentena obrigatoriu loron-14 nia laran.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here