Osan Dolar Amerikanu. Imajen/Google

DILI, 14 abríl 2020 (TATOLI)-Reitór Universidade da Paz (UNPAZ) Adolmando Amaral, informa oras ne’e nia parte infrenta hela problema falta orsamentu atu selu saláriu dosente hamutuk ema na’in 374 durante fulan-maiu 2020.

Mágnifiku Reitór UNPAZ ne’e dehan orsamentu ba funsionamentu universidade ne’e maihosi propinas estudante maibé daudaun ne’e prosesu selu propinas hosi estudante sira paradu hotu relasiona ho implementasaun estadu emerjénsia.

“Ita labele fó sala ba estudante sira maski sira la kumpre sira-nia obrigasaun maibé Buat hotu tanba situasaun. agora ita mak tenki hulan naha todan ida ne’e,” dehan, Adolmando ba TATOLI, via telefone (14/04/2020).

Kada fulan universidade tenki selu dosente 374 ho montante orsamentu rihun atus ida resin.

Atu rezolve krize finanseira ne’e, parte UNPAZ mós garante ba Governu no Parlamentu Nasionál atu konsidera sira-nia problema liuhosi proposta ne’ebé maka Klibur Instituisaun Ensinu Superiór Privadu (KIESP-TL) hodi husu subsídiu ba Governu.

“Se estadu emerjénsia ne’e mak to’o de’it fulan ida ne’e ba ami laiha problema tanba ami sei bele selu hela saláriu ba dosente sira. Maibe estende ba fulan oin,  ami sei iha problema tanba ami laiha ona reseita atu foti hodi selu dosente sira,” nia realsa liután.

Maibé nia hateten sei esforsu atu buka meiu seluk atu selu saláriu dosente sira ne’ebé daudaun ne’e hanorin hela estudante sira liuhosi Sistema online maski Governu la responde sira-nia pedidu.

Jornalista : Tomé Amado

Editór     : Agapito dos Santos

1 KOMENTÁRIU

  1. Hanoin hakarak ka lakoi, Governo tenke apoiu subside ba instituisaun Privadu sira hodi grantia funsionamento instituisional Liu Liu instituisaun Akademia sira iha teritorial. Tamba instituisaun Akademia privadu sira nia rendimento mai husi estudante sira, agora ho estado hasoru hela impase politika ida nbe Lori tempo naruk, allende nee mosu tan moras covid-19 nebe fo impaktu nbe makas teb-tebes ba ekonomia nasaun nian, Liu Liu ba povu. aproveita situasaun virus korona estado dekreta estado de mergencia halo povu tenki karentina iha sira nia uma. Ho situasaun hirak nee fo ameasa bot ba komersiu sira too ba instituisaun akademia privadu sira hotu. Tamba nee Governo tenke trata politika ida nbe adekuadu hodi asegura situasaun sira nee hotu.

HAKEREK NO HATÁN

Please enter your comment!
Please enter your name here