Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 14 abríl 2020 (TATOLI)-Governu Timor-Leste daudaun ne’e koordena ona ho Kuba hodi apoiu médiku Kubanu sira atu halo prevensaun ba surtu COVID-19.

Portavóz Sala Situasaun Sentru Integradu Jestaun Krize (SIJK), Rui Maria de Araújo, liuhosi konferénsia imprensa iha Sentru Konvensaun Dili, tersa (14/04/2020) hateten pedidu estadu Timor-Leste nian ba Kuba ne’e relasiona ho númeru kazu pozitivu coronavirus kontinua aumenta hosi loron ida ba loron seluk.

Eis Primeiru-Ministru, Rui Maria de Araújo, realsa liután médiku Kubanu lubuk ida durante ne’e servisu ona iha Timor-Leste ho esperiénsia iha moras oioin.

“Médiku Kubanu nian daudauk ne’e lubuk ida servisu hela iha Timor–Leste no sira barak mak iha esperiénsia no servisu hela  iha epidemia lubuk ida iha África  hanesan ébola no sira seluk, entaun sira ne’e mak Ministeriu Saúde ho sala situasaun halao kontaktu ho sira oinsá mak aproveita sira nia skill atu reforsa tan ekipa ne’ebé Ministeriu Saúde prepara,” tenik, Doutór Timoroan Rui Maria de Araújo.

Nia dehan Timoroan hamutuk ema na’in lima maka konfirmadu pozitivu COVID-19 hafoin fila hosi Indonézia iha loron 01/04/2020 no kuarentena iha Otél Katuas Dili.

Entertantu, Timor-Leste to’o tersa ne’e rejista ona kazu pozitivu hamutuk neen, ema na’in ida rekupera ona no fila ona ba nia uma, maibé na’in lima seluk izola ona iha fatin izolamentu Sentru Saúde Vera Cruz Dili.

CIGC Anúnsia Tan Kazu Pozitivu Foun Rua ba COVID-19

Jornalista : Hortencio Sanchez

Editór     : Agapito dos Santos

HAKEREK NO HATÁN

Please enter your comment!
Please enter your name here