Portavós CIGC no Koordenadór Ofisiál Ligasaun Forsa Tarefa COVID-19, Rui Maria de Araújo. Imajen Tatoi/Egas Cristovão

DILI, 14 abríl 2020 (TATOLI) – Portavóz Sala Situasaun Sentru Integradu Jestaun Krize (SIJK), Rui Maria de Araújo, relata simu informasaun hosi Governu Portugal katak profesóra ida kona pandemia COVID-19 hafoin evakua hosi Timor-Leste foinlalais hodi fila bá sira nia nasaun orijen.

“Ita foin simu informasaun hosi Portugal katak, iha (04/042020) grupu portugés ne’ebé sai hosi ne’e iha profesora ida ne’ebé to’o iha Portugal halo teste no hetan pozitivu,”dehan, Doutór Rui Maria de Araújo liuhosi konferénsia imprensa iha Sentru Konvensaun Dili, (CCD-sigla portugés), tersa (14/04/2020).

Atu kontribui halo prevensaun ba COVID-19 maka pasiente ne’e husu ona apoiu ba autoridade saúde Portugal, Diplomátiku no liuhosi kooperasaun saúde internasionál atu indentifika ema se maka besik liu profesora ne’e durante sei hela iha Timor-Leste.

“Oras ne’e daudaun ekipa vijilánsia epidemiolojika halo hela akompañamentu, monitoriza hela hodi foti medida ba laboratóriu karik presiza,” katak Eis Primeiru-Ministru iha Governu konstitusionál daneen.

Maibé ekipa médiku sira sei presiza tan tempu loron hirak tuir mai hodi fó sai loloos dadus kona-ba profesora ne’e sofre moras durante hela iha Timor-Leste ka hetan bainhira halo viajen ba Portugal.

“Ita seidauk to’o iha konkluzaun katak nia hetan moras ne’e hosi ne’ebé, ita sei presiza loron balu tan hodi hetan rezultadu,” hatutan Rui Maria de Araujo.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here