Komandante PNTL Munisípiu Bobonaro, Superintendente Xefe, Octávio de Araújo Bucar. Imajen Tatoli/Antonio Goncalves

BOBONARO, 14 abríl 2020 (TATOLI)-Komandante PNTL, Munisípiu Bobonaro, Superintendente Xefe Polisia, Octávio de Araújo Bucar, relata durante implementasaun estadu emerjénsia iha Munisípiu Fronteira ne’e, foin maka rejista kazu asidente trafegu ida no kazu asaltu malu entre joven sira.

“Durante estadu emerjénsia ne’e la’o iha kazu rua de’it, kazu asidente ema monu ho motor rezulta ema na’in ida mate fatin no vitima ida seluk transfere ba Ospitál Nasionál Guido Valadares (HNGV-sigla portugés), Kazu ida seluk maka asaltu malu iha área burasa laran,”informa, Superintendente Xefe Polisia, Octávio Bucar de Araújo, ba TATOLI, via telefone, tersa (14/04/2020).

Komandante Polisia ne’e esplika kazu asaltu malu ne’e akontese iha loron 01 fulan abríl 2020 entre grupu joven tanba hemu lanu.

Hodi hatutan, momentu ne’ebá joven sira hasai liafuan mal trata hasoru polisia sira bainhira atu atua situasaun ne’e hodi garante siguransa ba populasaun durante implementasaun estadu emerjénsia ne’ebé ligadu ho surtu COVID-19.

“Momentu ne’eba sira tuur grupu hemu tua no polisia ba halo atuasaun sira hasai liafuan mal trata hasoru polisia tanba ne’e maka prende sira lori halo investigasaun no aplika ona termu identidade rezidénsia,”tenik Bucar.

Funsionáriu Públiku na’in rua mós involve iha kazu asaltu malu ne’e tanba ne’e Polisia aplika ona TIR ba joven hirak ne’e.

Hatan kona-ba situasaun siguransa én jerál iha Munisípiu Bobonaro, Komandante Polisia ne’e hatete situasaun la’o hakmatek tanba hetan seguransa másimu hosi Forsa Integradu Polisia Nasionál Timor-Leste, Munisípiu nian no FALINTIL-Forsa Defeza Timor Leste (F-FDTL).

“Ami nia patrullamentu la’o normal hela tanba atendementu ba kazu sira la’o hela,”nia dehan tan.

Jornalista : Agapito dos Santos
Editór       : Francisco Simões

HAKEREK NO HATÁN

Please enter your comment!
Please enter your name here