Koordenadór Ligasaun Ofisiál ba Forsa Tarefa COVID-19, Rui Maria de Araújo. Imajen/Egas Cristovão

DILI, 14 abríl 2020 (TATOLI)-Tuir dadus hosi Gabinete Sentru Integradu Jestaun Krize (SIJK) fó sai katak to’o tersa (14/04/2020) ne’e rejistu ema na’in neen maka pozitivu ona ba surtu coronavirus ka COVID-19.

Portavóz Sentru Integradu Jestaun Krize, Rui Maria de Araújo, hateten hosi pasiente COVID-19 na’in neen, ema na’in ida rekupera no fila ona nia-uma no na’in lima seluk SIJK koloka ona bá iha fatin izolamentu Sentru Saúde Vera Cruz hodi hetan tratamentu saúde.

“Dadus kona-ba COVID-19 loron ohin ninian ema ne’ebé iha kuarentena 570, ne’ebé deskonfia hatudu sintoma mai hosi fatin afetadu 178 ne’e, númeru akomulativu hahú hosi 6 fulan- marsu to’o ohin loron, hosi númeru ne’e 34 mak ita sei hein rejultadu teste hosi laboratóriu no na’in neen mak konfirmadu,” dehan, Eis Primeiru-Ministru, Rui Maria de Araújo, durante konferénsia imprensa, iha Sentru Konvensaun Dili, tersa (14/04/2020).

Pasiente pozitivu na’in lima ne’e hanesan estudante Timoroan ne’ebé durante ne’e hela iha kuarentena obrigatóriu Otél Katuas Dili hafoin fila hosi Indonézia foinlalais.

“Sira nain lima ne’ebé konfirmadu pozitivu sira viajen hamutuk iha karreta ida de’it, Bis ne’ebé tula sira ne’e ekipa Ministeriu Saúde nian mak aluga atu tula espesfikamente Timoroan sira ne’ebé tama hosi fronteira mai, karreta ne’e mai ho motorista ida no ajudante rua karreta ne’e ho nia xapa mátrikula 37: 811 TL no motorista ne’e naran Deolindo Pereira ha’u husu lisensa ona ba nia hodi hato’o nia naran iha públiku atu nune’e públiku bele tuur hakmatek,”esklarese Rui Maria de Araújo.

Motorista ho ajudante na’in rua daudaun ne’e kumpre ona kuarentena obrigatóriu iha Motain, Munisípiu Bobonaro atu nune’e ekipa saúde bele observa sira-nia kondisaun saúde ba prevene COVID-19.

Kazu Coronavirus ne’ebé SIJK deteta komesa loron 10 abríl to’o tersa ohin, maihosi kuarentena Otél Katuas Dili tanba ne’e ladun iha risku atu hada’et ba abitante sira iha fatin seluk.

Eis Xefe Governu ne’e rejeita informasaun ne’ebé espalla iha públiku katak hafoin tula estudante sira hodi rai iha otél Katuas Dili, Bis ne’e mós tula kedas pasajeiru seluk lori fila ba Maliana, ne’e informasaun laloos.

“Ha’u konfirma ona ho motorista no ema sira ne’ebé iha fronteira katak bainhira sira mai hosi fronteira Polisia mak akompaña no karreta ne’e fila mós Polisia mak akompaña no para kedan iha mota ain,” tenik Doutór Timoroan ne’e.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here