Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães. Imajen Tatoli/Egas Cristovão

DILI, 14 abríl 2020 (TATOLI) – Ministru Koordenadór Asuntu Ekonómiku interinu, Fidelis Manuel Leite Magalhães, informa katak iha nasaun balun maka konfirmadu ona katak disponível importa foos mai Timor-Leste.

“Ministériu Negósiu Estranjeiru no Kooperasaun (MNEK) konfirma no iha ona resposta pozitiva husi país tolu ka haat, inklui Organizasaun Internasionál ida maka prontu bele apoiu bainhira iha nesesidade. Detalla bainhira ita hahú importa sasán tama”, dehan Ministru Fidelis hafoin ramata enkotru ho Ajénsia Ekonómiku no liña ministériu, iha edifísiu TradeInvest, Colmera, tersa ne’e.

Governante ne’e adianta, agora iha faze administrativu hotu ona no tuir mai faze ida ne’ebé la’o hela, enkuantu MNEK maka sei kontaktu embaixada no país sira seluk.

“Ami husu MNEK bele ko’alia ho sira atubele importa mai Timór. MNEK komunika tan ho país sira seluk ne’ebé seidauk halo aprosimasaun atu sira mós konsidera fa’an sira nia foos mai Timór”, subliña atuál Ministru Reforma Lejizlativa no Asuntu Parlamentár ne’e.

Nia realsa, rezultadu ne’ebé MNEK halo ona maka embaixada sira servisu hamutuk hodi haree ba nasaun sira kria kondisaun atu importa sira-nia foos mai Timor-Leste.

“Setór privadu sira mós kontinua nafatin ho importasaun. Ho Estadu Emerjénsia ne’e la taka dalan atu atividade komersiál la’o nafatin”, nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here