Komandante PNTL Munisípiu Bobonaro, Superintendenti Xefe, Octávio de Araújo Bucar. Imajen/Antonio Goncalves

BOBONARO, 14 abríl 2020 (TATOLI)-Vise Prezidente Ekipa Task Force ba Prevensaun COVID-19 iha Munisípiu Bobonaro, Superintendente Xefe Polisia, Octávio de Araújo Bucar, hateten, atu prevene transmisaun surtu covid-19, ekipa task force hasai ona desizaun hodi suspende atividade basar kada loron sábadu no movimentu transporte públiku iha Munisípiu Bobonaro.

Tuir Nia atividade hirak ne’e sei funsiona hikas hanesan bain-bain hafoin data implementasaun estadu emerjénsia ramata iha loron 26 fulan abríl 2020.

Operasaun motorojek agora paradu totál, operasaun karreta pasajeiru hanesan bis suspende hotu, atividade basar iha maliana kada loron sábadu agora ami suspende,”katak, Bucar ba TATOLI, via telefone, tersa (14/04/2020).

Maibé desizaun ne’e la taka dalan ba sidadaun sira atu asesu merkadu hodi sosa sasán nesesidade bázika iha merkadu durante loron bain-bain.

“Basar ne’ebé uluk ema barak ne’e agora laiha,”tenik tan.

Tuir observasaun nota populasaun pursentu 80 iha Bobonaro maka oras ne’e kumpre ona desizaun Governu hodi halo movimentu, maibé pursentu 20 sei la’o hodi halo sira-nia servisu.

Kona-ba ekipa task force ne’ebé estabelese iha Bobonaro, Nia dehan lidera diretamente hosi Prezidente Autoridade Munisípiu hodi involve PNTL, F-FDTL, Bombeiru, Ministériu Saúde ho liña Ministeriál ho autoridade lokál sira.

Ekipa ne’e mós hola papel ida maka oras ne’e halo sensibilizasaun informasaun ba komunidade kona-ba prevensaun COVID-19 liliu atu fase liman beibeik ho sabaun, me’ar ka fani tenki taka ibun, mantein distánsia metro ida ka rua ho ema seluk hodi halo prevensaun ba COVID-19.

Entertantu, tuir desizaun Governu impelementasaun estadu emerjénsia ne’e hahú ona iha loron 28 fulan-marsu no sei ramata iha 26 fulan abríl 2020.

Jornalista : Agapito dos Santos

Editór       : Francisco Simões

HAKEREK NO HATÁN

Please enter your comment!
Please enter your name here