Estudante sira ne'ebé mai hosi Indonézia liu husi Fronteira Motain, bainhira to'o ho Bus tun iha Otél Katuas, Dili iha loron 1 abríl. lmajen Tatoli/Cipriano Colo

DILI, 14 abríl 2020 (TATOLI) – Hafoin Sentru Integradu Jestaun Krize (CIGC, sigla portugés) anúnsia kazu pozitivu daruak COVID-19 iha loron 10 abríl, motorista rua inklui ajudante haat husi Bus Maliana rua, iha loron tuir mai tama kedan iha kuarentena tanba mai ho timor-oan na’in-tolu ne’ebé konfirmadu pozitivu.

Motorista no ajudante ba Bus Maliana tama kuarentena iha Postu Administrativu Maliana, Munisípiu Bobonaro.

Tuir nota husi CIGC ne’ebé Agência Tatoli asesu iha tersa ne’e relata katak, tanba laiha ona movimentasaun transporte públiku hafoin Prezidente Repúblika deklara Estadu Emerjénsia iha loron 28 marsu, hahú oras 00:00, maka Governu liuhosi Ministériu Saúde kontrata Bus Maliana rua hodi transporta sidadaun sira husi fronteira terrestre Mota-Ain bá Díli.

Nune’e iha loron 1 abríl, bus rua ne’e transporta timor-oan sira hamutuk 37 no hetan akompañamentu husi Unidade Polísia Fronteira (UPF) to’o Otél Katuas, Dili, ne’ebé hanesan fatin kuarentena.

“Hafoin detekta no fó sai kazu pozitivu foun ida iha Dili iha loron 10 abríl 2020, iha loron tuir mai, motorista na’in-rua no ajudante na’in-haat husi Bus refere tama kedas iha Kuarentena iha Maliana. Sira na’in-neen iha hela observasaun Ministériu Saúde nian, durante loron hirak ne’e, no ohin loron 14 abríl, ekipa Vijilánsia Epidemiolójika no Ekipa Laboratóriu Nasionál sei ba Maliana hodi foti sira nia amonstra, maski risku atu hada’et Coronavírus kiik tebes”, esplika nota ne’e.

Notísia Relevante: Ekipa Saúde Sei Foti Amostra Pasajeiru Bis Maliana Maski Seidauk Hatudu Sintoma

Ohin, Timoroan Na’in 37 Tama Hosi Fronteira Terrestre

Tuir definisaun husi Organizasaun Mundiál Saúde (OMS) no Planu Kontijénsia ne’ebé aprova husi Governu, konsidera risku ba COVID-19 mak ema ne’ebé kontaktu ho kazu pozitivu.

“Definisaun kontaktu tuir OMS mak ema ne’ebé iha kontaktu besik ho kazu pozitivu iha loron 2 antes to’o loron 14 hafoin ema pozitivu ne’e hetan sintoma”, refere nota imprensa ne’e.

Nune’e, iha Timor-Leste ninia kazu positivu dahuluk ne’ebé fó sai ona, hatudu sintoma iha loron 8 abríl mak konsidera nu’udar risku ba COVID-19 mak sira ne’ebé iha kontaktu ho kazu pozitivu husi loron 6 to’o 22 abríl 2020.

Entretantu motorista inklui ajudante husi Bus Maliana rua hirak ne’e laiha kontaktu ho kazu pozitivu ne’ebé anúnsia ona iha periudu ne’ebé define dadaun.

Nune’e mós, kontaktu besik, tuir definisaun OMS no Planu Kontijénsia nian mak hanesan kontaktu ho distánsia menus husi metru ida durante minutu 15, iha kontaktu direta ho ema pozitivu, pesoál saúde ka médiku sira ne’ebé halo tratamentu ba infetadu kazu pozitivu no sira ne’ebé hela hamutuk ho ema ne’ebé infetadu kazu positivu.

“Tanba ne’e GIGC husu atu públiku atu mantein kalma, labele pániku no hela iha ida-idak nia fatin, kontribuisaun ne’ebé di’ak liu no efetivu husi públiku mak mantein iha ida-idak nia fatin, labele sai ba liur bainhira la persiza, no kontinua halo tuir prátika ihiene ne’ebé fó sai ona antes”, subliña nota ne’e.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here