Ministru Koordenadór Asuntu Ekónomiku interinu no atuál Ministru Reforma Lejizlativa no Asuntu Parlamentár, Fidelis Manuel Leite Mangalhães realiza reuniaun ho Ajénsia Ekonómiku sira no Liña Ministeriál iha Sala TradeInvest, Colmera, segunda (14/04). Imajen Tatoli/Egas Cristovão

DILI, 14 abríl 2020 (TATOLI) – VIII Governu Konstitusionál kontinua halo esforsu hodi deskute medida sira ba setór ekonómiku ninian, iha ámbitu Estadu Emerjénsia ligadu ho surtu COVID-19, maibé sei foti desizaun iha reuniaun Konsellu Ministru (KM).

Ministru Koordenadór Asuntu Ekonómiku interinu, Fidelis Manuel Leite Magalhães konvoka hikas reuniaun ho Ajénsia Ekonómiku no liña ministeriál sira, hodi deskute kle’an liután kona-ba medida sira ne’ebé sei implementa.

Maski enkontru ne’e hala’o ba datoluk ona, maibé governante ne’e seidauk bele pronunsia detallu kona-ba medida no mekanismu ne’ebé sei implementa, tanba sei halo diskusaun iha reuniaun KM kuarta aban (15/04).

Ministru interinu ne’e relata, objetivu prinsipál iha enkontru ohin maka kona-ba setór ekonómiku iha Timor-Leste no medida sira iha setór ekonómiku.

“Ami ohin ko’alia kona-ba médida saida mak Governu halo, kona-ba impaktu ba situasaun ekonómiku ne’ebé iha diskusaun téknika sira aprezenta preokupasaun ita hotu nian, liuliu tanba COVID-19 iha surtu karik, ita lahatene nia impaktu oinsá, ita hatene impatu ne’e aat, maibé bainhira iha surtu tan entaun sei pior liután, satán tempu ne’e prolonga tan katak bainhira mak iha vasina no bainhira mak iha ai-moruk atubele kura COVID-19 ne’e”, informa atuál Ministru Reforma Lejizlativa no Asuntu Parlamentár ne’e hafoin sorumutu iha salaun TradeInvest, Colmera, tersa ne’e.

Notísia Relevante: Ministru Fidelis Aprezenta Proposta Subsídiu ba Kada Uma-Kain $100 ba KM

Governante ne’e konsidera, hanesan Estadu, tenke konsidera pontu prinsipál hirak ne’e no iha medida balun prevee ona hodi bele antisipa saida mak sei akontese iha tempu oin mai.

“Ami seidauk bele fó sai detallu ba medida sira ne’ebé ami deskute, bainhira seidauk hetan aprovasaun iha Konsellu Ministru”, nia akresenta.

Enkontru ne’e partisipa husi Membru Governu sira hanesan Ministra Edukasaun, Juventude no Desportu, Dulce Soares, Ministru Ensino Superiór Siénsia no Kultura, Longuinhos da Silva Monteiro, Ministru Administrasaun Estatal interinu, Abílio José Caetano, Ministru Obra Publika, Salvador Eugénio Soares dos Reis Pires, Ministru Agrikultura no Peska, Joaquim José Gusmão dos Reis Martins, Ministra Solidariedade Sosial no Inkluzaun, Armanda Berta.

Nune’e mós, Ministra Finansa ein ezersísiu, Sara Lobo Brites, Ministru Negósiu Estranjeiru no Kooperasaun, Dionísiu Soares Babo, Sekretáriu Estadu Komunikasaun Sosiál, Merício Juvinal dos Reis ‘Akara’, Sekretáriu Estadu Formasaun Profisionál no Empregu, Julião da Silva, Sekretária Estadu Igualdade Jéneru no Inkluzaun, Maria José Fonseca.

Partisipa mós Governador Banku Sentrál Timor-Leste (BCTL, sigla portugés), Abrãao de Vasconselos, inklui Segundu Komandante Polisía Nasionál Timor-Leste, Mateus Fernandes.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here