Ministru Agrikultura no Peska, Joaquim José Gusmão dos Reis Martins. Imajen Tatoli/Egas Cristovão

DILI, 14 abríl 2020 (TATOLI) – Ministériu Agrikultura no Peska (MAP) sei fahe ai-moruk rega hare ba agrikultór sira, maibé daudaun hein relatóriu hosi ekipa estensionista destaku sira iha munisípiu no postu administrativu.

Tuir Ministru Agrikultura no Peska, Joaquim José Gusmão dos Reis Martins, rekoñese daudaun agrikultór sira preokupa tanba sira-nia hare balun hahú isin ona no presiza rega ai-moruk.

“Kona-ba ida ne’e ha’u seidauk simu informasaun, maibé estensionista MAP nian iha terrenu normalmente halo hela servisu hodi identifika problema sira hodi halo relatóriu ba kestaun ne’e. Ho informasaun sira ne’e, ha’u sei ko’alia ho sira parte agrikultura no ortikuktura para bele haree”, hateten Ministru Joaquim José ba Agência Tatoli, iha salaun TradeInvest, Colmera, tersa ne’e.

Mekanizmu ne’ebé MAP uza hodi halo distribuisaun ai-moruk ne’e maka bazeia ba lista ne’ebé estensionista sira sei aprezenta iha relatóriu.

“Ai-moruk ne’ebé rega ba hare ne’e stock sei iha, ne’ebé sosa ho orsamentu 2019 nian. Kona-ba mekanizmu fahe ai-moruk rega hare ne’e, bazeia ba relatóriu husi estensionista destakadu MAP nian. Relatóriu ne’ebé sira hato’o mai mensiona klaru kedan ona katak iha fatin ne’e iha pesti ataka hare, ne’ebé MAP sei fahe ai-moruk ne’e ba agrikultór hotu tanba ne’e papél MAP nian hodi fó asisténsia ba agrikultór hotu iha territóriu Timor-Leste”, dehan Joaquim.

Iha parte seluk, Agrikultór husi Postu Administrativu Laleia, Munisípiu Manatuto, Domingos Mariano Gusmão, preokupa tebes tanba sira buka ai-moruk atu sosa iha loja agrikultór ne’ebé baibain sira sosa, maibé daudaun ne’e loja sira taka.

Tanba ne’e, nia parte husu Governu liuhosi MAP karik bele apoia lalais, nune’e sira bele uza hodi rega hare ne’ebé besik isin ona.

“Ami presiza tebes ai-moruk rega hare. Baibain ami sosa de’it, maibé fatin sira ne’ebé ami sempre sosa taka hotu parese tanba ita-nia situasaun agora, ne’ebé Governu iha ai-moruk karik ajuda netik tanba sé lae ami nia hare la aproveita no tinan ne’e labele halo kolleta tanba ular han hotu. Maibé kuandu ai-moruk iha no rega tiha ne’e di’ak ona”, dehan Domingos Mariano, via Rede Sosiál, Facebook.

Domingos Mariano haktuir, daudaun ne’e hare balun foin atu isin no balun seidauk, maibé tenke antisipa kedas ai-moruk nune’e kuandu mosu ona ular ataka ba hare sira ne’e, agrikultór sira garante ona katak iha ai-moruk hodi kura.

Entretentu, Agrikultór Laleia maioria utiliza irigasaun Bulutu ne’ebé konstroe husi Governu Japaun hodi fornese bee ba natar.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here