Ema na’in-52 rona esplikasaun husi ekipa Ministériu Saúde molok re-integra bá sosiedade. Imajen Tatoli/Florencio Miranda Ximenes

DILI, 14 abríl 2020 (TATOLI) – Governu liuhosi Ministériu Saúde, hamutuk ho Sentru Integradu Jestaun Krize (CIGC, sigla portugés) re-integra tan ema na’in-52 bá sosiedade, hafoin kumpre ona kuarentena durante durante loron 14 no laiha sintoma ba COVID-19.

Diretór Gabinete Apoiu Jurídiku no Kontajioza, Belarmino da Silva Pereira, informa ekipa re-integra tan ema na’in-52, kompostu husi mane na’in-33 no feto hanutuk 16 bá sosiedade tanba hahú husi loron dahuluk to’o komplete loron 14 laiha sintoma COVID-19.

“Ita-nia ekipa médiku akompaña hahú kedan husi loron dahuluk sira tama hodi halo observasaun médiku, dader no lorokraik to’o loron 14, hatudu ita-nia ema 52 la hatudu sintoma COVID-19. Ho nune’e, ita bele re-integra bá família”, tenik Belarmino iha seremónia re-integra iha Sentru Formasaun Tibar, tersa ne’e.

Nia adianta, ema na’in-52 ne’ebé kumpre ona kuaretana durante loron 14 ne’e, kompostu husi Munisípiu Baucau na’in-ualu, kompostu husi feto rua no mane neen, Munisípiu Bobonaru iha mane ida, Munisípiu Dili hamutuk 35, kompostu husi mane 20 no feto 15, Ermera mane na’in-tolu, Liquiçá mak mane rua no Viqueque hamutuk mane ida no feto ida.

Prosesu re-intregasaun bá sosiedade, tuir Belarmino, ekipa ne’ebé forma ona liuhosi Polísia Nasionál Timor-Leste (PNTL) hamutuk ho FALINTIL-Forsa Defeza Timor-Leste (F-FDTL), sei akompaña ba kada munisípiu to’o postu administrativu no suku sira.

“Ita servisu hamutuk ho Ministériu Administrasaun Estatál (MAE) atu fó mensajen ba sosiedade katak sira ne’ebé re-integra ona ne’e to’o agora livre husi sintoma COVID-19, atu sosiedade bele simu sira ho di’ak”, nia akresenta.

Nia esplika tan, durante ema na’in-52 ba sosiedade no família, ekipa saúde sei kontinua kontaktu atu informa ba sira kona-ba kondisaun sira nia durante loron 14.

“Ami foti sira nia númeru kontaktu, iha munisípiu, postu administrativu to’o suku sira, atu ami bele akompaña nafatin durante loron 14 atubele hetan informasaun husi sira, bainhira hetan sintoma ruma bele kontaktu filafali ekipa médiku sira”, nia realsa.

Hafoin timor-oan na’in-52 husik kuarentena Tibar-II ne’e, iha Sentru Formasaun Tibar, maka ekipa médiku halo kedan dizinfektasaun no prepara halo levatamentu dadus atu muda fali timor-oan ne’ebé iha kuaretena iha otél sira bá fatin refere.

“Ami halo ona levatamentu dadus atu muda filafali ita nia maluk balun ne’ebé kuarentena iha otél, muda mai fali iha ne’e. Tanba fatin ne’e Governu nian no ita bele uza, maibé sira ne’ebé ita sei muda mai iha ne’e mós sei konta nafatin nia loron kuaretena”, Belarmino afirma.

Nune’e, Koordenadór Estudante husi Indonézia kuaretena iha Tibar, Joõa Paulo da Costa, hato’o agradesimentu ba pesoál saúde, inklui PNTL no F-FDTL ne’ebé durante ne’e asegura sira, liliu ba atendimentu ne’ebé di’ak tebes.

“Ami promete bainhira fila ba uma, sei tuir regra distánsia sosiál ho ami-nia família no komunidade”, nia akresenta.

Ho nune’e, nia husu nafatin ba Governu, atu kontinua esforsu maka’as asegura rai-laran atu labele hetan propagasaun COVID-19 maka’as liután.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here