Imajen Espesiál.

DILI, 14 abril 2020 (TATOLI)–Diretòr Kompañia Labilay, João da Silva hateten, maski estadu dekreta Estadu Emerjénsia maibé traballadór hosi Kompañia Labilay kontinua konsiente hodi fó kontribuisaun ba Estadu no Governu Timor-Leste hodi rekolla lixu iha iha Postu Administrativu Cristo Rei no Na’in Feto, Munisípiu Dili.

Nia hatutan, maski traballadór sira kontinua hala’o knaar hodi rekolla lixu maibé kompañia presiza apoiu subsidiu hosi Governu liuliu ekipamentu prevensaun no protesaun ba traballadór sira atu proteje an bainhira rekolla lixu.

Imajen Espesiál.

“Ami konsiente katak ami-nia traballadór sira kontinua serbisu no kumpre regra hosi Autoridade Munisípiu Dili maski Estadu dekreta ona Estadu Emerjénsia iha 27 marsu 2020. Maibé, ami konsiente nafatin no mantein mós distánsia sosiál no distánsia fíziku iha terenu bainhira rekolla lixu. Maibé, ami presiza husu subsidiu ba Governu hodi bele fasilita tan ami-nia ekipamentu prevensaun no protesaun nian hodi proteje trablladór sira-nia an,” dehan Diretòr Kompañia Labilay, João da Silva, ba Ajénsia TATOLI via telefone, tersa ne’e.

Tanba, nia dehan, bainhira dehan Estadu Emerjénsia traballadór mak la serbisu entaun problema boot liu mak lixu iha sidade Dili aumenta barak. Tanba ne’e, traballadór sempre kontribui no halo tuir regra no kuida ijiéne hodi fase-liman beibeik bainhira halo atividade hanesan raut no soe foer.

Nia hateten, kompañia mós simu orientasaun hosi Munisípiu Dili katak labele para serbisu iha situasaun agora tanba bainhira serbisu para mak sei iha problema boot tanba lixu aumenta barak ba beibeik, nune’e kontinua hamoos no bainhira au hamoos tenke uza máskara no luvas.

“Ho ida ne’e ha’u mós hato’o ona proposta ba Autoridade Munisípiu Dili no mós Ministériu Administrasaun Estatál tanba kapasidade Kompañia nian la to’o atu bele haree situasaun ida ne’e. Ami husu iha ekstra ka subsidiu ruma ba traballadór sira ka la’e tanba traballadór sira rasik mak ejize subsidiu ho razaun katak ema barak la serbisu maibé ami kontinua serbisu iha Estadu Emerjénsia ba COVID-19 nian,” nia haktuir.

Nia fó razaun, pesoál rekolla lixu iha ekipamentu ne’ebé mak natón de’it tanba ne’e mak presiza apoiu hosi parte relevante hodi asegura traballadór sira-nia serbisu bainhira ba rekolla lixu iha terrenu.

“Ami ejize nafatin atu sira (Governu) bele ajuda ami tanba ami mós iha kapasidade natón de’it hodi ajuda ita-nia traballadór sira. Tanba ita hotu hatene katak bainhira para serbisu mak dehan la kontribui ona ba Estadu ida ne’e, tanba ne’e ami nafatin orienta sira hodi kontinua serbisu. Nune’e, Kompañia nia preokupasaun mak tenke ajuda subsidiu ruma hosi Governu hodi apoiu di’ak liután fasilidade ba protesaun no prevensaun ba COVID-19 nian tanba lixu mós bele prodúz virus tanba ne’e husu nafatin apoiu,” nia rekomenda.

Nia informa, traballadór sira ne’e serbisu loron-loron hahú segunda to’o domingu. Nia dehan, kada loron kareta ida tenke tula foer dala tolu (3) no bainhira foer hotu no moos ona mak sira bele deskansa.

Diretòr Kompañia Labilay, João da Silva hatete, Kompañia Labelay iha karreta hamutuk 17 ho nia traballadór hamutuk 85 inklui kondutór ne’ebé kada karreta iha ema na’in lima (5).

Notísia Relevante: Laiha Estadu Emerjénsia ba Ekipa Saneamentu

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here