Símbolu partidu KHUNTO. Foto espesiál

DILI, 14 abríl 2020 (TATOLI)—Bankada Parlamentár Kmanek Haburas Unidade Nasionál Timor Oan (KHUNTO), apoia desizaun Primeiru-Ministru (PM), Taur Matan Ruak, ne’ebé dada ona ninia karta demisaun hosi Prezidente Repúblika, Francisco Guterres ‘Lú Olo’.

“Kona-ba pedidu demisaun ne’ebé Primeiru-Ministru retira fali ne’e la prevee iha lei. Ne’e direitu sidadaun sira hatama mak dada fali mós ne’e direitu sidadaun sira-nian. Ami (KHUNTO) mantein nafatin no kumpre nafatin orientasaun hosi Primeiru-Ministru, Taur Matan Ruak”, Deputadu Bankada KHUNTO, Luís Roberto, informa ba jornalista sira, iha Parlamentu Nasionál, tersa ne’e.

Nia afirma, ho surtu COVID-19 ne’ebé invade mundu tomak, KHUNTO kontinua tau konfiansa ba Primeiru-Ministru, Taur Matan Ruak, hodi buka dalan halo prevensaun no kombate moras ne’e.

“Ita labele dehan apoia ka la apoia maibé haree ba situasaun agora ita tenke apoia duni hodi prevene moras COVID-19 ne’e. Se moras ne’e laiha ita ko’alia buat seluk”, Luís Roberto informa.

Prezidente Repúblika (PR), Francisco Guterres ‘Lú Olo’ simu karta demisaun hosi Xefe Governu iha loron domingu (24/2/2020) no Primeiru-Ministru, Taur Matan Ruak rasik deklara karta demisaun ne’e iha loron segunda (25/2/2020).

Purtantu, iha loron kuarta, 08 abríl 2020, Primeiru-Ministru, Taur Matan Ruak, retira nia karta demisaun tanba ho razaun surtu COVID-19.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here