Guilhermina Mali Dasi Mau (loos), akompaña direta husi nia-alin Yohanes Fernades Talis Bau (karuk), hala’o konferénsia imprensa iha ninia rezidénsia, Caicoli, segunda (14/04). Imajen/Epy Maubere

DILI, 14 abríl 2020 (TATOLI) – Guilhermina Mali Dasi Mau, nu’udar bin husi Yohanes Fernades Talis Bau (YFTB), lori família nia naran husu deskulpa ba Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur, maski la’ós nia-alin mak tolok maibé tanba utilizadór ida uza identidade hanesan YFTB hodi tolok veteranu ne’e liuhosi mídia sosiál, Facebook.

“Ho situasaun ne’ebé maka mosu ba ha’u-nia alin, hanesan bin ida ho hakraik-an husu deskulpa no perdaun ba aman Veteranu Majór Jenerál Lere Anan Timur ho família, inklui públiku kona-ba akontesimentu ne’ebé mak virál iha mídia sosiál”, tenik Guilhermina liuhosi konferénsia imprensa iha Caicoli, tersa ne’e.

Guilhermina esklarese tan katak, aktu refere la’ós nia-alin mak halo tanba nia-alin rasik la hatene lee no hakerek.

Notísia Relevante:PCIC Liberta Hikas Suspeitu Tolok Jenerál Lere Tanba Laiha Indísiu Krime

“Iha ema balun mak laran moras hodi tenta hakarak hafo’er ha’u-nia alin nia naran. Ba ema ida ne’ebé mak hahalok a’at tanba tenta hakarak estraga ha’u nia alin nia naran laiha buat ida, ami família entrega de’it ba Maromak”, dehan Bin husi YFTB.

Ho nune’e, nia esplika tan kona-ba kronolojia ne’ebé mak loron hirak liu ba virál loos iha mídia sosiál.

“Hanesan família no hanesan bin, ha’u hakarak esklarese kronolójia ba públiku katak: loos, ami nia aman tentara duni, maibé ami nia inan ho aman ema Timór puru no ami moris no bo’ot iha Caicoli. Atu klarifika de’it ba públiku katak iha momentu 1999, ho situasaun ne’ebé manas iha ita-nia rai laran, halo ita hotu halai namkari no ami família halai fahe malu,” nia esklarese.

Nia dehan tan: “Ha’u nia aman no inan, inklui alin sira ne’ebé ki’ik halai ba Atambua no ha’u rasik ho maun sira no família balun maka halai sa’e ba Dare”.

“Hafoin ita ukun-an tiha, iha tinan 2003 ha’u-nia alin Asau (Yohanes) deside filafali mai Timór hodi hamutuk ho família no hela iha Caicoli to’o agora”, nia akresenta.

Ho nune’e, nia afirma, nu’udar bin ida laran moras no triste haree ema ataka ninia-alin ho liafuan oin-oin iha mídia sosiál.

“Realidade ne’ebé mosu iha públiku ne’e, ema deskoñesidu balun mak tau ha’u-nia alin nia foto no halo identidade Facebook falsu hodi trata aman veteranu sira, liuliu aman veteranu Majór Jenerál Lere Anan Timur.

Antes ne’e, Xefe Estadu Maiór F-FDTL, Majór Jenerál Lere Anan Timur, iha kinta (09/04), hala’o konferénsia imprensa ne’ebé partisipa direita husi supeitu ne’ebé deskonfia halo mal tratamentu nian no hateten katak nia parte fó perdua suspeitu ne’ebé mak tolok nian.

Entretantu, Polísia Sentífiku Investigasaun Kriminál (PCIC, sigla Portugés) liberta hikas suspeitu ne’ebé halo mal tratu ba Jenerál Lere, liuhosi mídia sosiál Facebook, tanba konsidera laiha indísiu krime.

Jornalista: Florencio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here