Diretór Ezekutivu SAMES, Santana Martins, Imajen Tatoli/Osória Marques.

DILI, 14 abríl 2020 (TATOLI)-Diretór Ezekutivu Servisu Autónomu Medikamentu no Ekipamentu Saúde (SAMES), Santana Martins, konfesa katak estoke ekipamentu ba protesaun COVID-19 ba Médiku no pesoál saúde iha armazén SAMES Kampung-Alor Dili besik atu hotu tanba falta de’it item 10.

Ho limitasaun ne’e, maka nia parte buka atu jere didi’ak estoke restu ne’e hodi hein fali ekipamentu foun ne’ebé governu sosa daudauk.

”Maibé ida ne’e nesesidade ne’ebé mak iha entaun mezmu ita halo jestaun maibé situasaun ne’e difikulta nafatin ita no dalan úniku mak ajénsia internasionál sira ne’ebé mak iha dalan karik atu apoiu lalais ita liu-liu roupa protensaun sira hodi hein prosesu sira ne’ebé mak iha,” hateten, Santana Martins ba Jornalista sira iha SAMES Kampung-Alor Dili, tersa (14/04/2020).

Nia suzere bainhira sosa ekipamentu protesaun coronavirus ne’e tenke pakote kompostu hosi roupa protesaun, óklu, sapeo,luvás, maskra, botas no seluk tan.

Presidente Komisaun F Parlamentu Nasionál, Maria Barreto. Imajen/Tatoli Egas Cristovao

Iha hanesan komisaun F PN, ne’ebé trata asuntu saúde no edukasaun, iha tersa (14/04/2020) halo fiskalizasaun urjente ba armazén SAMES hodi deskobre katak ekipamentu ba protesaun COVID-19 iha estoke limitadu no presiza responde lalais.

Prezidente Komisaun F PN, Maria Barreto hateten, iha semana kotuk aviaun Airnorth tula ona mai rai-laran ekipamentu protesaun COVID-19 ba médiku sira maibé to’o tersa ohin, SAMES seidauk simu item hirak ne’e.

“Ami mai iha ne’e bazeia mós ba informasaun ne’ebé mak fó sai iha Radiu Televizaun kona-ba ekipamentu COVID-19 nian ne’ebé aviaun airnoth tula lori mai iha ita-ra’in maibé to’o agora SAMES seidauk simu ekipamnetu hirak ne’e,” deklara Maria Barreto.

Tanba ne’e nia husu ba Ministériu Saúde atu rai ona ekipamentu hirak ne’e iha Armazén SAMES hodi distribui ba terrenu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here