Embaixadór Timor-Leste ba Indonézia, Alberto Xavier Pereira Carlos. Imajen/Liputan6.com

DILI, 14 abríl 2020 (TATOLI) –Embaixada Timor-Leste iha Repúblika Indonézia, ohin, hasai tan karta avizu ida ba Timoroan hotu ne’ebé reside iha territóriu Repúblika Indonézia no mós ba sidadaun estranjeiru-sira katak, Embaixada TL iha Jakarta sei la fasilita Timoroan ka ema estranjeiru atu tama territóriu nasionál Timor-Leste.

Notísia Relevante : Timoroan Ne’ebé Reside iha Territóriu RI Evita Viajen Mai TL

Karta Avizu

Karta avizu ne’ebé Embaixadór TL ba RI, Alberto Xavier Pereira  Carlos, dirije mós mai Ajénsia Tatoli ne’e, esklarese mós katak, embaixada TL inklui Konsuladu Jerál Timor-Leste iha Bali, Konsuladu TL iha Kupang, no mós Konsuladu Onoráriu TL iha Medan, fó sai avizu ne’e bazeia ba Despaixu No.19/GABMI/IV/2020, Governu Timor-Leste deside ona hodi taka fronteira hotu iha Timor-Leste ba Timoroan, nune’e mós ema estranjeiru atu tama ba territóriu nasionál Timor-Leste.  Despaixu ida-ne’e hahú aplika ona dezde loron 13 abríl 2020 ba oin.

Liuhosi karta avizu Embaixada TL nian iha Jakarta ne’e, aprofunda tan katak,   Governu Timor-Leste sei la tolera Timoroan ka ema estranjeiru tama ilegálmente iha territóriu nasionál.  Tanba ne’e, Embaixada husu atu kontinua mantein kontaktu no komunikasaun ho embaixada liuhosi meiu komunikasaun ne’ebé  sirkula ona iha avizu-sira antes ida-ne’e.

Notísia Relevante : Relasiona ho Coronavirus, Embaixada TL iha Jakarta Alerta ba Timoroan Labele Pániku

“Bainhira ita hadomi ita nia-rain, ita-nia inan ho aman, maun-alin sira, ita tenke simu desizaun ne’ebé ita nia Governu hasai hodi hakmatek iha fatin ne’ebé ita hela daudaun,” hateten Embaixadór Alberto X.P Carlos, liuhosi karta aviza ne’e.

Embaixada TL iha Jakarta, Konsuladu Jerál iha Bali, Konsuladu iha Kupang, Ajénsia Konsulár iha Atambua ho Konsuladu Onoráriu iha Medan,  sei hamutuk ho maluk-sira nafatin durante tempu difisil ida-ne’e no sei extende nafatin “Protesaun Konsulár”.

“Harohan ba Nai Maromak, atu hamutuk nafatin ho ita hotu,  atu nune’e, loron ida ita bele fila-hikas ba ita rain,” hateten Embaixadór Alberto X.P. Carlos iha karta avizu ne’e.

Jornalista         : Eugénio Pereira

Editór              : Francisco Simões

HAKEREK NO HATÁN

Please enter your comment!
Please enter your name here